Михайло Фейса – лавреат Премії Антонія Годинкы

7. фебруара 2014 в Будапештї ся одбылa научна конференція, на котрій проф. Др. Михайлови Фейсови з катедры русиньского языка і літературы на Філозофічній факултї Універзїты у Новім Садї (Сербія) была передана Премія Антонія Годинкы.

Премію удїлює Цїлодержавна русиньска самосправа Мадярьска на честь дня народжіня академіка Антонія Годинкы, а того року то было о то славностнїше, бо святкуєме 150 років народжіня того вызначного мадярьского ученого, історіка і етноґрафа, академіка Мадярьской академії наук – Антонія Годинкы (1864 – 1946), Русина родом зо села Ладомирів (окр. Снина). Оцїнюючі Фейсову роботу, главно од девятьдесятых років 20. стороча, было вырїшено же лавреатом премії того року буде праві він, якый приспів к розвитку русиньского языка і літературы у Сербії.

В роцї 1992 роцї у Бардеёвскых Купелях (Словакі) ся одбыла Перша міджінародна конференція русиньского языка, а Михайло Фейса, як представитель із Сербії, став членом ту створеной  інтерреґіоналной комісії, яка взяла ся за кодіфікацію окремых варіантів русиньского языка, котры мали по часї створити єдиный русиньскый язык – койне. Над тым проєктом зачав робити і він. Днесь кодіфікація русиньского языка є зроблена у штирёх варіантах, а того року влїтї у Румунії буде представлена і підкарпатьскый варіант русиньского языка, чім ся закінчіть 22-річна робота над тым, чому ся Фейса окремо радує.

Окрем гото, же до Будапешту пришов перевзяти собі премію, проф. Др. Фейса  на научній конференції  прочітав і лекцію о розвою серьбского варіанту русиньского языка. На конференції выступили і далшы научны працовници, а то Маріянна Лявинець, Тібор Міклош Поповіч і Марія Ортупай.

Пaмятный діплом і Премію Антонія Годинкы здобыв проф. Др. Михайло Фейса за вызначный вклад до розвоя русиньского языка і културы. Ґратулуєме.

-аз-, фотка автора