Клуб на заплаканя

Мій остатнїй коментарь, котрый дотуляв ся роботы Світовой рады Русинів, самого председу Дюру Папуґу так назлостив, аж мусив написати реакцію. В порядку. Окрім іншого, в ній писав, же єм неадекватным способом оцїнив і крітіковав роботу Світовой рады. Но, не пересвідчів ня ани на секунду своїм текстом, і што навеце, по послїднїм засїданю рады у Деві собі думам, же дотеперь єм іщі все мав надію, же аж таке плане то з радов не є. Теперь знам, же є.

Членове Світовой рады, окрем того, же ся стрічають і нич основне властно ниґда не рїшають, тадь посмотьме ся лем з котров вызначнов світовов ці европсков інштітуціёв ся їм подарило стрітити, ці котра влада, презідент, парламент їх прияв, із кым, коли, што властно вырїшыли наприклад у важнім вопросї позіції Русинів на Українї, та окрем того вшыткого іщі основно цїлый час робить дїла, котры суть проти штатуту (становам). Тым найосновнїшым порушованём є хоснованя назвы Світовый конґрес Русинів / Руснаків / Лемків, і кідь такой назвы офіціално не є, не є єй ани в основнім „законі“ конґресу – в штатутї і роблять то наперек тому, же на то была їх увага веце раз звернута. Світова рада, пяна чутём, же собі може робити што хоче, собі і робить што хоче. І кідь єй таку назву конґрес – значіть найвысшый орґан, не схвалив.

Світова рада бы собі на самый перед мала усвідомити, же гей, є даяков „владов“ на період двох років міджі конґресами, але тота влада може робити лем то, што єй схвалив „парламент“, котрым є Світовый конґрес Русинів і не то, што собі она захоче. Рада не розуміє, же не мать необмеженый мандат, але має мандат лем такый, якый ї быв даный. Має мандат на то, жебы коордіновала роботу міджі конґресами, заступала Русинів на міджінародній уровни, але не має мандат на свойвольне недотримованя штатуту і зміны в нім. Сучасна рада то робить якраз навспак.

Друге, чому представителї Світовой рады не розуміють, то є то, же они там не суть самы за себе. Дюра Папуґа, там не є за Дюру Папуґу, ани нихто далшый там не є за своє мено. Суть там за окремых членів Світового конґресу, значіть за орґанізації, котры їх номіновали. І зато їх мандат є прямо залежный од тых орґанізацій. Зато кідь іде Світова рада дашто важне прияти, потім бы мали членове рады наперед інформовати свої орґанізації, котры там заступають, продіскутовати то і голосовати в радї на основі рїшіня своёй домашнёй орґанізації. Бо они там мають презентовати погляды не свої, але своёй орґанізації. Навеце член рады за Свтовый форум русиньской молодежи бы мав конзултовати важны справы нелем зо своёв матерьсков орґанізаціёв, з котрой є, а зо вшыткыма орґанізаціями, котры суть у форумі і котры заступать коло рады. І подля того голосовати. Не знам, як то роблять іншы членове рады, но можу повісти, же представитель за Словакію і представитель за Світовый форум з никым нич не конзултують і голосують самы за себе. Же то так роблять і далшы членове, о тім єм пересвідченый.

Третім незрозумінём Світовой рады є то, же конґрес быв заснованый на прінціпі інклузівіты, жебы Русины зо вшыткых держав мали даяку сполочну платформу, котра їх репрезентує. Рада уж довшый час намагать ся зробити з того ексклузівный клуб, з тым, же они ідуть рїшыти, хто там може і хто не може быти. Но і теперь можеме іти ку послїднёму нзасїсаню СРР.

Тото што робила Світова рада в Деві, то є дашто о чім уж треба серёзно зачати думати як о самодештрукції конґресу на основі комбінації того вшыткого, што єм вже вытолковав – на основі порушованя і іґнорації штатуту, незрозуміня функції рады і конґресу, некомунікації представителїв з матерьскыма орґанізаціями, тадь нашто, і навеце є то самодештрукція на основі прімітівного одстранёваня „неприятеля“, значіть тых, котры мають іншый погляд на фунґованя конґресу.

Правда така, же рада ани поряднї не знать свій штатут, бо она хотїла Северну Америку, Чеську републіку і Словеньску асоціацію русиньскых орґанізацій (САРО) вылучіти такой там на тім засїданю СРР у Деві. Рада не знать ани властны резолуції, бо не спомямула собі ани на то, же то была резолуція рады, жебы Словакію репрезентовала Русиньска оброда і САРО довєдна з тым, же то было схвалене конґресом, і же ся навеце підписав договор міджі Русиньсков обродов і САРО. В тій резолуції докінця было становлене кілько членів є за кого на конґресї участных, і же представителя в радї за Словакію буде мати два рокы Русиньска оброда і два рокы САРО. Самособов, Русиньска оброда ниґда тот договор не дотримовала і САРО ниґда іщі од 2007 року, коли то было доїднане, представителя у Світовій радї не мала. Зато арґумент, же САРО не ходить на засїданя Світовой рады, є злым фіґлём мінімално з боку Владиміра Противняка і Мартіна Караша. Кідь їм нечлен рады пояснив, же тото, што хотять зробити, зробити не можуть, потім прияли рїшіня, же вылучіня спомянутых будуть рекомендовати конґресу. Ґратулую. Конґрес, котрый бы ся мав намагати мати што найвеце членів, жебы были залучены вшыткы державы, де Русины жыють, іде вылучіти 3 членьскы державы – Споєны штаты Америкы, Канаду, Чехію і половину члена за Словакію. Остатнїй раз, кідь ся робили чісткы, так ся то звало комунізм. Видно, же членове рады мають з тов політічнов сістемов богаты позітівны скушености. Вылучованя зачало Сидором, днесь уж продовжує цїлыма державами. То є траґікомічне.

Пропозіція, жебы ся за приятя Росії до Світогово конґресу голосовало тайно вказує але іншый аспект нашых „вшемогучіх“. Мають доста смілости хотїти вышмарити вшыткых, котры ся їм не полюблять і не роблять так, як то они хотять, а не мають доста ґуражі на то, жебы ся публічно приголосили ку свому погляду в одношіню Росії як члена конґресу. Значіть, кідь треба рїшыти важны дїла, омывають собі рукы.

З припадным вылучінём спомянутых є повязана іщі єдна справа. Папуґа у своїм выголошіню, котре єм крітіковав, дякуючі чому єм го дотиснув написати холем єден полемічный текст, писав і то, же рада не є согласна зо жадныма орґанізаціями і їх конґресами, котры суть, можеме повісти, радікланы. Звідам ся, коли выникнув Світовый конґрес підкарпатьскых Русинів і далша опозіція Світовому конґресу і на основі чого? Хто бы не знав, припомяну, же то зачало вылучінё Димітрія Сидора зо СРР, намісто того, жебы ся рїшыв вопрос Русинів на Українї. З рішінём выголосити незалежну Републіку Підкарпатьска Русь можеме і не мусиме быти согласны, але не рїшыть ся то такым способом, же вышмариме члена конґресу і повіме, лем жебы сьме ся не забруднили перед Києвом мы, же нас ваша справа не інтересує. І теперь собі треба дати далшый вопрос. Тым вопросом є, што рада чекать од того, же вылучіть далшых членів. Кідь не хоче підпорити про ню радікалны ґрупы, не давать як раз такым способом нагоду на то, жебы тоты ґрупы были міцнішы?

Честована Світова радо, покля ся вы два рокы стрічали під каждов третёв верьбов і доказали так акурат выдати колядкы, пару чісел часопису, котрый не мать змысел і зробити „мултіжанровый фестівал“, котрый є на сміх, Северна Америка зробила петіцію, жебы были узнаны Русины на Українї. Кідь уж хочете робити з конґреса ексклузівный клуб, потім собі треба пояснити, як то фунґує. Єксклузівіта ся не здобывать вышмарёванём тых, котры мають іншый погляд. Она ся здобуде добров роботов і резултатами. Втогды мають люди інтерес быти в такім клубі. Ваша робота, методы роботы і резултаты суть, нажаль, такы, же жадну екслузівіту не принесуть. Принесуть лем самодештрукцію, покля ся не спамятате. Тым ся істо запишете до історії, але не буде то позітівне записаня. Днесь не сьте клуб ексклузівіты, і кідь ся так справуєте, а клуб на заплаканя. З конґресу бы не мали одыйти тоты, котрых пропонуєте, але хтось іншый.

Петро МEДВІДЬ, Пряшів

(Статя была написана як коментарь „Вступне до контроли“ лемківского радіа lem.fm)