Уряд влады Словацькой републікы зачінать выплачати грошы меншынам

Уряд уповномоченого влады Словацькой републікы про народностны меншыны зачав процес підписованя змлув із успішныма жадателями о дотації з проґраму Култура народностных меншын 2015 р. Інформує о тім пресова справа Уряду влады СР, під котрый належыть і Уряд уповномоченого.

В централнім реґістрі змлув суть од днесь публікованы першы змлувы, і так першы фінанції в сумі 28 706 евр будуть мати орґанізаторы меншыновой културы на своїх банковых рахунках в найблизшых днях. Є то майже місяць скорїше, як тому было в минулім роцї. В пресовій справі ся далше пише, же Уряд влады має інтерес продовжовати в зачатім трендї і промптно выплачати грошы успішным жадателям.

Комісії окремых народностных меншын, котры оцїнюють поданы проєкты і роздїлюють грошы той-котрой народностной меншыны міджі схвалены проєкты, скінчили своє засїданя. 24-го і  25-го фебруара 2015 р. засїдала комісія про русиньнску народностну меншыну. Тота мусила посудити 168 поданых проєктів. Комісія рекомендовала 125 проєктів і роздїлила міджі них цїлу Русинам признану тогорічну суму 294 032 евро.

Петро МЕДВІДЬ, Пряшів