„Выкопали ґріб“ 25-річным Народным новинкам. Хто?

Члены одборной комісії про русиньску народностну меншыну як порадного орґану Уряду уповномоченого влады СР про народностны меншыны: Мілан Андраш – председа ( як знам, він там за нас боёвав осамоченый як єдиний вояк в поли – замінованім „одборниками“ і з особами-„бетоновыма бункрами“), Алена Блыхова, Феодозія Латтова, Мілан Ян Піліп, Ладіслав Ладомиряк, Татяна Кмецова, Светлана Хомова, Софія Даскалова, Даніел Грубала і Барбора Костоліаньска, а „посвятили го“ компетентны працовници даного уряду і Уряду влады СР. То было повіджено образно, але в реалности будуть мати на сумлїнню ЗАНИК ПЕРШЫХ І НАЙСТАРШЫХ ПОРЕВОЛУЧНЫХ НОВИНОК В РУСИНЬСКІМ ЯЗЫКУ „з нагоды“ їх 25-річа і 20 років од кодіфікації русиньского літератрурного языка на Словеньску, в чім тоты новинкы зограли єдну з домінантных задач.

Якым способом, так, же з пожадованых на проєкт Народны новинкыод уряду 19.536 евр комісія їм схвалила лем 2 032 еура (!!!), за што ся 12 чісел новинок не дасть у тім роцї выдати! (На порівняня: подобны, але обшырнїшы новинкы ІнфоРусин дістали з пожадованых 40 000 евр солідных 30 000 тісяч еур !!!) Вызерать так, же за пару тыжднїв Народны новинкы перестануть дефінітівно выходити, чім ся сповнить і єден із снів єдного коншпіратора зо Здружіня інтеліґенції Русинів Словакії, котрый уж много хосенно про Русинів Словакії зничів а іщі зничіть, подля правила, хто не іде зо мнов, хто мене не слыхать, тому амен. По інформації, кілько нам схвалили на новинкы, обернув єм ся устно і писмово на дакотрых найвысшых челных представителїв Уряду влады СР о дофінанцованя нашых новинок, і увидиме за пару тыжднїв, ці реакція буде позітівна, або неґатівна. Кідь неґатівна, так тым новинкы перестануть выходити!!!

Кідь єм зачав од того найважнїшого проблему, так доповню то тым, якы і як были схвалены русиньсков „одборнов“ комісіов далшы проєкты нашых двох обчаньскых здружінь (Русин і Народны новинкы і Академія русиньской културы в СР). На цїлофаребне выдаваня часопису Русин (хотїв єм то зробити подля прикладу лемківской „Бесіды“ або войводиньского „Руского слова“ , котры суть подобныма часописами) із пожадованых 15 744 евра комісія схвалила 7 200 евр, за што быдеме мочі выдати 6 чісел Русина лем з фаребнов обалков, як дотеперь.

Академія русиньской културы в СР предложыла на рік 2015 вісем проєктів, з котрых было комісіов схвалено половину (штири проєкты). Першым проєктом із них суть зась піддімензованы інтернетовы новинкы Академія русиньской културы в СР, котрым комісія схалила лем єдну тісячку, хоць на кінцї засїсаня зіставала резерва, але комісія ю придала на електронічне поеріодікум „е-rusynFORUM“ Яна Липиньского, хоць тот мав уж (як все) схвалено пару тісяч евр веце як інтернетовы новинкы АРК в СР, котры минулого року дістала 500 евр а передминулого року 1 000 евр?!

Дале АРК в СР предложыла проєкты на выданя семох книжок, з котрых были схвалены і будуть фінанчно підпорены три книжкы (унісоно вшытку по 2 000 евр, хоць кажда книжка мать іншы параметры, наприклад, на схалену книжку Дїтём про радость і поучіня Меланії Германовой сьме жадали 3 160 евр а на книжкуЗдогадай, школярику Юрка Харитуна зась 3 800 евр, бо обидві сьме, як то пасує про дїти, хотїлки выдати публікації з твердым фаребным обалом, фаребныма ілустраціями,  лїпену і шыту книжку. Но за два тісяч свої планы не будеме мочі зреалізовати і будетем мысити одступити од представованой якости. До тройцї была схвалена і буде підпорена тыж 2 000 еврами іщі публікація Нашы горізонты Миколая Ксеняка.

Несхваленыма были тоты книжкы: Русиньскы соловї ІІ. (ед.) Анны Плїшковой, Фундамент нелем про Русинів Мілана Семанчіка, Обычайны слова Штефана Смолея і Факлї горять Юрка Харитуна.

Также довєсна нашых 5 схваленых проєктів будуть підпорены сумов 16 232 евра, што сьме приближно просили на 6 чісла цїлофаребного Русина, жебы сьме могли конкуровати Русинам на Лековинї або Войводинї што до формы часопису. Але іщі цїлковый вердікт не є знамый, але очекованый, а то односно Народных новинок, котрым „выкопаный гріб“ може быти і заметаный глинов неоднорности членів і нежычливцїв нам одборной комісії про русиньску народностну меншыну ці компетентныма працовниками Уряду влады СР?!

Александер ЗОЗУЛЯК,

шефредактор і председа ОЗ Русин і Народны новинкы і ОЗ Академія русиньской културы в СР