17. 4. 2015 зачінать театралный фестівал в Руськім Керестурї
В Руськім Керестурї в Сербії в пятніцю 17-го апріля 2015 зачінать уж 47-ый річник театралного фестівалу під назвов Драматічный меморіал Петра Різнича Дяді. Фестівал є як все орґанізованый керестурскым Домом културы і ёго завершіня буде в суботу 25-го апріля.
Фестівал понукать богатый розмаїтый репертоар і публіка буде годна відїти 14 театралных пєс, з котрых вісем буде про дорослу публіку і шість про дїти. На меморіалї будуть брати участь Руськый народный театер „Петро Різнич Дядя“, Драматічне штудіо „АРТ“ керестурского Дому културы, але і далшы ансамблї з Кулы, Петровець в Хорватії, Нового Саду, Дюрдёва і далшых місць у Войводинї.
Завершінём фестівалу буде выступлїня єдиного на світї русиньского професіоналного театру – Театру Александра Духновіча з Пряшова. Театер там выступить 25-го апріля наперед о 13.00 год. пополудне з новов приповідков, котра мала премєру лем минулый місяць і має назву Кідь бы пришов… Остатнім выступлїнём фестівалу, котре так само принесе Театер Александра Духновіча, буде пєся, котра є драматізаціов прозаїчной предлогы вызначной словацькой писателькы з епохы крітічного реалізму Божены Сланчіковой-Тімравы з назвов Тяпаковцї.
Почас фестівалу буде проходити у віторок 21-го апріля і Округылй стіл на тему Сучасный став театралного діяльства Русинів.
Петро Різнич Дядя, котрому є меморіал присвяченый, быв актором, режісером, педаґоґом і културно-освітнім діятелём міджі Русинами у Войводинї. О театер зачав інтересовати ся іщі на ґімназії, котру абсолвовав на Українї, в части, котра належала Російскій імперії, де ся народив. В 1919 роцї переселив ся до міста Старый Вербас і зачав орґанізовати драматічны кружкы міджі войводиньскымєа Русинами. Театралны пєсы зачав робити в Рускім Керестурї, Коцурї, но і в іншых центрах русиньского неселїня. У 1933 роцї засновав у Вербасї театер „Руска драма“. По другій світовій войнї ся переселив до Руського Керестура, де передавав лекції російского языка, но засновав там і драматічный і фолклорный ансамбльі. У 1948 роцї засновав першый русиньскый аматерьскый театер і о два рокы пізнїше і бабковый театер. Ёго мену суть присвячены як споминаный меморіал, так і Руськый народный театер „Дядя“.