„Варголовскы“ писанкы в Ужгородї

9-го апріля в Ужгородї коло мініпамятника Ендія Варгола, якбач найзнамнїшого у світї Русина і основателя поп-арту, были одпрезентованы писанкы вытворены якраз у тім умелецькім штілї.

Писанкы приготовили штуденты катедры турістікы Ужгородьского народной універзіты і робили їх на основі знамых творів Варгола. Почас місяця было зробленых веце як сто „поп-артовых“ писанок. Орґанізаротами той події были скулптор Михаіл Колодко і шпеціаліста на турістіку Федор Шандор.

Основным цілём, як інформовали оґанізаторы, было вказати, же великодны писанкы не суть лем традіціов, але же то може быти і цалком новый штіл уменя. Теперь варголовскы писанкы робили штуденты, но орґанізаторы надіяють ся, же за рік ці два, бы ся така подія могла зробити із участёв професіоналных умелцїв, котры занимають ся поп-артом.

Найлїпшы варголовскы писанковы творы были выбраны про експозіцію Закарпатьского музею народной архітектуры і жывота.

Жрідло: uzhgorod.in