Суд: „Узурпованя Руського дому было незаконне.“

Кавза Рускый дом мать за собов далшу етапу. Окресный суд в Пряшові высловив розсудок у дїлї леґітімности выбору здружіня Руськый клуб 1923. Подля вердікту были членьскы громады Руського клубу 1923, на котрых вылучіли зо свого членьства Гавриіла  Бескида і новым председом ся став Штефан Секерак – неплатно. Руськый дом в сучасности выужывають „секеровцї“, по 26. марцу 2015 ся сітуація обертать в їх непроспіх.

Перевзятя веджіня в обчаньскім здружіню (ОЗ) Рускый клуб – 1923 было нелеґітімне. Вырїшыв о тім окресный суд 26. марца 2015 на главнім їднаню. Односно россудку ся може друга сторона іщі одволати.

В припадї успіху на одволаваючім судї прийде на ряд спор о самотне ужываня Руського дому на Главній уліцї в Пряшові.

В сучасности го справує Надація Руськый клуб 1923, на котру го перевело ОЗ Руськый клуб – 1923 почас веджіня Штефана Секерака, яке суд означів за незаконне.

Стотожнив ся так зо своїм старшым россудком, котрый пізнїше Крайскый суд у Пряшові зрушыв і дїло вернув на Окресный суд у Пряшові.

 

Секерак: „Є то юстічна хыба.“

 

Членьскы громады были подля суду в роспорї зо законом і становами а суть неплатны.

Найвысшым орґаном ОЗ є у смыслї станов членьска громада, а тверджіня, подля котрого выконный выбор мать надряджене поставлїня, є неприпустне.  

„Тот спор поважую за юстічну хыбу“, высловив ся по выголошіню россудку Штефан Секерак і підкреслив, жер в тым дїлї ся можно одкличуть аж на европскый суд.

 

„Бескидовцї“ рыхтують далшу жалобу

 

Адвокат жалобцю Гавриіла Бескида ся высловив, же кідь будуть успішны і на одволаваючім судї, буде процес о Рускый дом продовжовати: „Мы мусиме дати жалобу, бо дошло ку неправопланости переводу Руського дому, котрый катастралный уряд записав, бо не мав причіну то одмітнути.“

К спору міджі двома ґрупами ОЗ дішло в роцї 2005. Вытворили ся два таборы под веджінём Секерака і Бескида.

Дванасту зміну станов міністерство внутра не хотїло узнати, бо „секераковцї“ до тых попереднїх дали клавзулу, же на кажду зміну станов треба і підпис одходящого председы і підпредседы.

Тым чіном „бескидовцї“ были заблокованы.

 

Суд: „Воля векшыны членів є веце як выбор.“

 

Суд їм дав за правду. Жалуюча сторона твердила, же к вылучіню Г. Бескида дішло у роспорї з втогды платныма становами. В тім часї ОЗ Руськый клуб – 1923 мало 40 членів, але по уведженій розопрї на членьскій громадї взяло участь лем шість членів.

Жалована сторона пропоновала жалобу одмітнути в цїлім россягу. Обгаёвала ся тым, же становы прияты „сепаратным“ Руськым клубом – 1923 („бескидовцями“) не были записаны на міністерстві внутра і їх платность, як і резолуція з їх членьской громады, суть неплатны.

Рїшало ся і самотне членьство жалобцїв у здружіню. Як доказ предложыли леґітімації і список притомных на членьскій громадї.

Жалована сторона тоты доказы не узнає. Доказовала, же на леґітімації є підпис Бескида, а не председы Секерака.

Тот на судї повів: „То не была членьска громада, але бісїда о Руськім домі... У нас є поступ при приниманю членів строгый, веце-менше є то выберове конаня.“

Суд але ся приклонив к погляду, же воля векшыны членьской базы є першоряда.

Єдна етапа кавзы ся так скінчіла. Наслїдовати буде одволаня і потім процес о самім Руськім домі.

Тот быв купленый в роцї 1925 за пінязї з цїлонародной збіркы. Потім го взяв од членів Руського клубу – 1923 штат почас періоду соціалізму. Руськый дом быв вернутый штатом у 90-ых роках минулого стороча. Властником ся так зась стало ОЗ Руськый клиуб – 1923.

Михал ФРАНК, Корзар із 27. 3. 2015, 2. стор.

Go back