XIII ШВЕТОВИ КОНҐРЕС РУСИНОХ/ РУСНАЦОХ/ ЛЕМКОХ ОД 18. ДО 21. ЮНИЯ 2015. У ДЕВИ У РУМУНИЇ

НА 8. ЗАШЕДАНЮ ШВЕТОВЕЙ РАДИ РУСИНОХ (РУСНАЦОХ/ ЛЕМКОХ) 28. ФЕБРУАРА У ГОРОДУ ДЕВА У РУМУНИЇ УТВЕРДЗЕНЕ

 

XIII Шветови конґрес Русинох/ Руснацох/ Лемкох и VII Шветови форум русинскей младежи буду отримани од 18. до 21. юния того року у городу Дева у Румуниї - заключене на 8. зашеданю Шветовей ради Русинох (Руснацох/ Лемкох), хторе отримане 28. фебруара у Деви у Румуниї, у безпоштредней орґанизациї Културного Товаришства Русинох Румуниї.

 

XIII Шветови конґрес Русинох/ Руснацох/ Лемкох будзе пошвецени 15-рочнїци од снованя Културного Товаришства Русинох Румуниї.

 

XIII Шветови конґрес Русинох/ Руснацох/ Лемкох будзе робиц у двох пленарних зашеданьох 19. и 20. юния, як и у 6 конґресних комисийох: за Статут Шветового конґреса РРЛ, за просвиту, за културу, за информованє и видавательну дїялносц, за историю Русинох/ Руснацох/ Лемкох и за медзисобне сотруднїцтво членских орґанизацийох ШК РРЛ и туристични розвой. Кандидатох за предшедуюцих конґресних комисийох членски орґанизациї Шветового конґреса РРЛ треба же би поднєсли тайомнїкови Шветовей ради РРЛ до 30. априла 2015. року. Под час зашеданьох конґресних комисийох будзе отримани VII Шветови форум русинскей младежи.

 

На XIII Шветовим конґресу Русинох/ Руснацох/ Лемкох и VII Шветовим форуму русинскей младежи буду участвовац по 10 делеґати, 5 госци и 5 млади зоз шицких членских орґанизацийох Шветового конґрееса РРЛ. Списки делеґатох, госцох и младих членски орґанизациї Шветового конґреса Русинох/ Руснацох/ Лемкох треба же би поднєсли тайомнїкови ШР РРЛ найпознєйше по 30. април 2015. року.

 

На XIII Шветовим конґресу Русинох/ Руснацох/ Лемкох будзе розпатрана и кандидатура МОО "Обєдинение Русинов" зоз Москви у Русийскей Федерациї.

 

На XIII Шветовим конґресу Русинох/ Руснацох/ Лемкох шветочно будзе уручена и Награда Шветовей ради Русинох (Руснацох/ Лемкох) под меном Василя Турока Гетеша у обласци русинскей култури за 2015. рок.

 

На предкладанє Комисиї за културу Шветового конґреса РРЛ хтора отримала свойо медзиконґресне зашеданє паралално зоз зашеданьом Шветовей ради РРЛ 28. фебруара 2015. року у Деви у Румуниї принєшена Одлука о розпшисованю Конкурса за подношенє кандидатурох членских орґанизацийох ШК РРЛ за тоту Награду за 2015. рок. Кандидатури ше годно подношиц по 30. април (04.) 2015. року.

 

На 8. зашеданю Шветовей ради Русинох (Руснацох/ Лемкох) за нового шефредактора "Голосу Русина", културно-белетристичного часопису у виданю Шветового конґреса РРЛ по порядним конкурсу вибрани Юрий Шипович, активни културни творитель медзи Русинами на Подкарпатю у України, учитель и лауреат Награди Шветовей ради РРЛ под меном Василя Турока Гетеша у обласци русинскей култури за 2012. рок, кеди тота награда уручоавана по перши раз.

 

За наступного домашнього XIV Шветового конґреса Русинох/ Руснацох/ Лемкох и VIII Шветового форума русинскей младежи кандидоване Дружтво Руснацох у Горватскей "Руснак".

 

На 8. зашеданю Шветовей ради Русинох (Руснацох/ Лемкох) и медзиконґресним зашеданю Комисиї за културу ШК РРЛ у Деви у Румуниї участвовали представнїки членских орґанизацийох ШК РРЛ зоз Сербиї, Мадярскей, Румуниї, Словацкей, Польскей, Подкарпатя у України, Горватскей и Шветового форума русинскей младежи.

 

Анї на того, 8. зашеданє Шветовей ради РРЛ нє одповолали ше представнїки Асоцияциї Русинских орґанизацийох зоз Зєдинєних Америцких Державох и Канади и Здруженя Русинох зоз Праги у Ческей Републики.

 

На 8. зашеданю Шветовей ради Русинох (Руснацох/ Лемкох) розпатрана анализа и оцена активносцох Шветовей ради РРЛ и конґресних комисийох Шветового конґреса РРЛ у 2014. и на початку 2015. року (актуални текст под насловом: Упечатлїви розвой русинского руху), а потим розпатрани и актуални стан и обставини медзи Русинами на Подкарпатю у України (актуални тексти: Войну треба и муши ше зопрец, Обращение Русинов Закарпатья, Президенту Парламенту Европи и Президенту Европейского союзу - з уровня Закарпатского обласного науково-културолоґическоого товаришства А. Духновича,  Народней Ради Подкарпатскей Руси и Крайового Товаришства Подкарпатских Русинох).

 

На 8. зашеданю Шветовей ради Русинох (Руснацох/ Лемкох) розпатрана и анализа и оцена вимиряня финансийних обовязкох членских орґанизацийох Шветового конґреса Русинох/ Руснацох/ Лемкпх за членарину за 2013. и 2014. рок, потим анализа и оцена витворйованя Плану проєктох (ґрантох) Шветового конґреса Русинох/ Руснацох/ Лемкой за 2014. рок, як и анализа и оцена вимиряня финансийних обовязкох членских орґанизацийох Шветового конґреса Русинох/ Руснацох/ Лемкох по проєкту "КОЛЯДИ/ KOLEDY/ CHRISTMAS при Русинох/ Руснацох/ Лемкох - писнї на чесц Рождества Исуса Христа" зоз 2014. року.

 

На 8. зашеданю Шветовей ради Русинох (Руснацох/ Лемкох) розпатране и предкладанє Плану проєктох (ґрантох) Шветового конґреса Русинох/ Руснацох/ Лемкох за 2015. рок, запровадзеня анализа и оцена витворйованя Плану означованя и преслави Дня Русинох/ Дня Руснацох/ Дня Лемкох у 2014. року и розпатране предкладанє и утвердзени План означованя и преслави Дня Русинох/ Дня Руснацох/ Дня Русинох на Лемковини и Дня Карпатских Русинох у 2015. року.

 

Зоз Плану означованя и преслави Дня Русинох/ Дня Руснацох/ Дня Русинох на Лемковини и Дня Карпатских Русинох у 2015. року окреме ше видвоює 24. април (04.) 2015. року кеди на Подкарпатю у України перши раз будзе означени и преславени Дзень Русинох на Подкарпатю.

 

Наступне 9. зашеданє Шветовей ради Русинох (Руснацох/ Лемкох) и медзиконґресне зашеданє Комисиї за културу буду отримани початком мая (05.) 2015. року у Будапешту у Мадярскей.

 

У Руским Керестуре, 19. априла 2015.

Дюра Папуґа,

предсидатель Шветовей ради Русинох(Руснацох/ Лемкох

 

(Публікуєме в орґіналї Д. Папуґы, т. є. у войвoдиньскім варіантї русиньского языка, жебы при перекладї не дошло к хыбам, тадь нашы Русины векшыну порозумить з той статї.)

Go back