Русины дістануть од штату веце пінязей

На 15. децембра 2014 Уряд влады Словеньской републікы выписав у Пряшові школїня, на котрім ся давали інштрукції ку подаваню ґрантовых проєктів у рамках проґраму Култура народностных меншын 2015. Термін подаваня проєктів на слїдуючій рік є до 19. януара 2015. Уряд уповномеченого влады СР про народностны меншыны бы і такым способом хотїв прискорити процес придїлёваня фінанцій жадателям.

Окрем того, посланцї Народной рады СР зачатком децембра схвалили пропозіцію владного закона о державнім розрахунку на 2015 рік з дакілько позмінюючіма пропозіціями. Схвалили і навышіня фінанчных средств про спомянутый проґрам Култура народностных меншын 2015 о 50 тісяч евр, котре ініціовав ведучій Уряду влады СР Іґор Федеріч посередництвом позмінюючой пропозіції підпредседкынї парламенту Яны Лашшаковой у Выборї Народной рады

СР про людьскы права і народностны меншыны.

Дотачна сума по конечнім схвалїню посланцями парламенту є у цїлковій вышцї 3 879 250 евр. Наперед была пропонована сума 3 829 500 евр. Інтернетовый сайт Уряду уповномоченого влады СР про народностны меншыны публіковав і перероздїлёваня фінанцій про окремы народностны меншыны подля крітерій, котры платять вже другый рік і были схвалены Выбором про народностны меншыны і етнічны ґрупы.

Найвеце, 1 955 296 евр, буде придїленых мадярьскій народностній меншынї. На підпору ромской културы ся придїлило 664 152 евр. Прилїпшыть собі і наша меншына. На Русинів піде того року з державного розрахунку 294 032 евр, што є о 30 тісяч евр веце, як в минулім роцї. Народностны меншыны з меншов кількостёв членів дістануть дотації од 30 до 90 тісяч евр. Вынятком є україньска народностна меншына, котра і в роцї 2015 буде тїсно над ґраніцёв 100 тісяч евр.

Высшы сумы уж другый рік здобывають Русины і дякуючі тому, же быв схваленый властно позміненый модел перероздїлёваня грошей міджі меншынами, котрый быв выдуманый Петром Штефаняком, председом орґанізації молоды.Русины і протиснутый у народностнім выборї членами Округлого стола Русинів Словеньска. Тот модел дає меншынї процента навеце покля не має властну державу і рахує із тым, кілько людей ся приголосило нелем ку народности, але і ку материньскому языку. То позітівно овпливнило наш розрахунок, бо веце як 20 тісяч людей собі записаало русиньскый язык як материньскый, але не приголосили ся ку русиньскій народности.

На Русинів на Словеньску бы так в наступнім роцї мали чекати дві позітівны новости. Є ту снажіня уряду прискорити процес фінанцованя і сума на нашу културу буде высша. Ці нам высша сума досправды поможе, зась є вопросом того, як русиньска комісія перероздїлить пінязї. Значіть, ці будуть підпоровати нашы пріорітны проєкты, або буде лем веце фестівалів.

Петро МЕДВІДЬ, Пряшів

Перероздїленя пінязей у сумі 3 879 250 евр на тоты народностны меншыны:

– мадярьска:               1 955 296 евр,

– ромска:                        664 152 евр,

– русиньска:                 294 032 евр,

– інтеретнічный і інтеркултурный діалоґ: 232 377 евр,

–  чеська:                        229 815 евр

– україньска:                  100 673 евр,

– нїмецька:                       88 880 евр,

– польска:                        64 683 евр,

– російска:                        53 377 евр,

– хорватьска:                   48 064 евр,

– жыдївска:                      52 825 евр,

– булгарьска:                   35 504 евр,

– моравска:                      30 489 евр,

– сербска:                        28 706 евр.