Русины схвалили проґрам розвитку. Зволили собі і нову презідію
2. мaя 2015 в Пряшові проходило 15. засíданя Округлого стола Русинів Словеньска (ОСРС). Найважнїшым пунктом проґраму было схвалїня Проґраму розвитку русиньской народностной меншыны в Словацькій републіцї. Дісклусна платформа собі зволила і нову презідію.
Засїданя зачало святочнов частёв. Членове ОСРС ся стрітили коло памятника Александра Духновіча, де положыли квітя, жебы так дали честь 150. річніцї од смерти того найвекшого народного будителя карпатьскых Русинів. Потім уж проґрам продовжовав традічно робочов частёв.
Найважнїшов частёv 15. засїданя ОСРС было схвалїня Проґраму розвитку русиньской народностной меншыны в Словацькій републіцї, документу, на котрім робили членове од початку свого діяльства у 2012 р. Проґрам розвитку має, окрем преамбулы, пять частей – Народностна самосправа, Школство, Култура, Інштітуції, Села і міста. За выпрацованя окремых частей были одповідны ґаранты окремых комісій, котры были коло ОСРС заснованы. Головным кооріднатором документу быв першый председа і сучасный член ОСРС Александер Дулеба. Тот документ має быти проґрамом Русинів на слїдуючіх 10 аж 20 років і має забеспечіти розвиток русиньской народностной меншыны і спомаліня асімілації. Окремым доповнїнём того проґраму має быти пропозіція Закона о народностных меншынах із ділнї ОСРС, котрый хотять Русины дати на публічну цїлосполоченьску діскузію з цілём глядати штонайшыршу обчаньску і політічну підпору про приятя закона, котрый доднесь Словацькій републіцї в одношіню ку меншынам хыбує. Часть того закона находить ся і в першій части схваленого проґраму і говорить о народностній самосправі, котра бы мала быти чісто в области културы і народностного школства, значіть не іде о теріторіалны самосправы.
По року собі ОСРС волив і нову презідію. Функцію председы по роцї зась обгаїв Андрій Ліґа, правник, жыючій в Пряшові. Далшыма членами презідії суть: секретарь Мілан Піліп, говорця Петро Медвідь, представитель колектівных членів Люба Кралёва (ОЗ Колысочка – Kolíska), представитель індівідуалных членів Петро Юрчішин. Членами презідії ex offo суть членове Выбору про народностны меншыны і етнічны ґрупы Мілан Мнягончак і Ян Липиньскый.
Петро Медвідь, пресовый говорця ОСРС, Пряшів, 2. мая 2015 р.
(Веце інформацій на www.pilip.sk)