Партія Most-Híd має „візію“ про села з русиньсков меншынов

Партія Most-Híd понукать селам з ромсков або русиньсков народностнов меншынов в области Шаріша, Земпліна і Спіша можливость залучіти ся до проєкту, інформує Пресова аґентура Словацькой републікы (TASR).

Проєкт, котрый партія понукать селам з тыма двома меншынами в спомянутых областях має быти о обновліню сел. Перед дакілько тыжднями на тот цíль вытворили на выходí Словакії здружіня Лавка (Lávka), подля моделу ініціатівы Пурт (Purt), котра довгодобо фунґує в области Ґемера і партія Most-Híd є партнером той ініціатівы.

Уж в місяцї май дістане 9 сел Пряшівского самосправного края конкретну підпору. Подля крайского посланця за партію Most-Híd і русиньского актівісты Петра Крайняка підуть фінанчны средства наприклад на оправу плота в селї в окресї Свідник, на закуплїня кроїв у Свіднику і подобны актівности. Тым подля нёго партія вступує на нову платформу адресной підпоры селам в рамках малых проєктів. Тота платформа є частёв їх проґрамового документу з назвов Обчаньска візія 2016 (Občianska vízia 2016), котрый 5. мая 2015 р. одпрезентовали в Пряшові.

Луція Жітнянска, посланкыня Народной рады Словацькой републікы за партію Most-Híd в Пряшові інформовала, же про села мають приправленый і проєкт Моє село (Moja dedina), котрый выходить із того, же дакотры рїчі в минулости фунґолвали і днесь як кібы не фунґовали. Партія хоче на селах вытворити такы условії, жебы там люди были годны зістати і найти собі роботу. Зато хоче партія підпорити локалну выробу в селах.

Most-Híd мало своїх представителїв на пресконференції і на далшых подіях на выходї Словакії головно зато, бо хотять так, як то мають в іншых частях Словакії, выбудовати міцны штруктуры. В окресах Свідник і Стропків давають свої надії до нового окресного председы, Русина, Михала Ґоріщака і в окресї Бардеёв до нового окресного председы і віцепріматора міста Бардеёв Владиміра Савчіньского.

Петро Медвідь, 7. 5 .2015