Умер соліста ПУНА – Юрій Ватащін

• Плаґат ПУНА з ёго загранічного турне, на котрім є Ю. Ватащін з ёго преславленов розножков.)

8. мая 2015 року умер у свого сына в Празї бывшый соліста- танечник втогдышнёго „Піддуклянського українського народного ансамблю“, днесь русиньского Піддукляньского умелецького народного ансамблю Юрко Ватащін, знамый „розножкарь“ і „скорчкарь“, родак із села Вырава на Лабірщінїі.

 

Народив ся 24. октобра 1939 р. у родинї, де уж было пять сестер. А то по восьмох роках по сестрах, як ся ёго отець вернув зо зарібків із Канады. Як штудент середнёй школы занимав ся соловым танцём, ходив по конкурзах. Хореоґрафы ПУНА Меланія Нємцова і Еміл Сметана такой обернули увагу на молодого талентованого танечника, а як пришов на конкурз до театру, цїла сала танцёвала і такой быв приятый до колектіву. В ПУНА быв од року 1958. Скоро ся став солістом і в ансамблю протанцёвав 23 років. На добу ПУНА, танёваня по селах, містах, дома і за граніцями, роздаваня радости, веселости – на тот час найвекшой славы колектіву, любив Юрко Ватащін все споминати. Із своїма парадныма танцями: польков, коломыйков, скоками, розножками походив нелем наш русиньскый реґіон, тляпкали му бо Франції, Нїмецьку, Голандії, Швайцарії, Анґлії, Америцї, Канадї, Булґарії, на Українї і многых іншых державах світа.

Каждому перед очами остануть ёго чародійны розножкы і дякуючі ёму были салы набиты до послїднёго місця. Каждый хотів відїти тото чудо, што ся двигало аж попід повалу.

 

Блаженый покій і вічная память Тобі!

 

P. M.

Go back