Русин, котрый зробив ґраматіку про Ромів

14. мая 2015 припомянули сьме собі 175 років од народжіня Юрія Ігнаткова. Хто то быв і чім записав ся нелем до русиньской історії?

Народив ся Юрій Ігнатков 14. мая 1840 року в Михалівцях. Хоць не жыв довго, бо умер лем 45-річный, свій жывот жыв барз актівно. Робив як педаґоґ і журналіста. По закінчіню універзіты Ігнатков учів латиньскый, староґрецькый і російскый языкы на ґімназії в Будапештї. Быв і дописователём русиньскых новинок Слово, друковане у Львові, і до новинок „Вістник для русинов Австійской державы“, котры выходили у Відню. Таксамо писав і до словацькых новинок „Pešťbudínske vedomosti“.

Ігнатков безуспішно намагав ся засновати русиньскы новинкы в Будапештї. Пізнїше одышов до Ужгорода і робив у редакчній радї першых русиньскых новинок, котры выходили на Підкарпатю під назвов Світ. В тых роках зачав і учіти на ужгородьскій ґімназії. То але не трывало довго, лем єден рік. Запричінене то было тым, же державны орґаны были проти ёго статям у новинках, котры были заміряны на русиньскый жывот і російску літературу з підкреслінём погляду на тоты темы в рамках панславізму і крітічной позіції до політікы мадярізації, котра в тім часї проходила в Угорьску нелем в одношіню ку Русинам, но і ку далшым народам.

У 1867 роцї Ігнатков быв посланый назад до Будапешту, де знова безуспішно намагав ся засновати русиньскы новинкы під назвов „Отечество“. Пізнїше дістав функцію у містї Левоча а пак у містї Лученець, де пропаґовав ідею сполупраці міджі Русинами і Словаками. В тім часї продовжовав у писаню на тему русиньского жывота до львівскых старорусскых новинок Слово, але таксамо в тім часі писав інформачны нарисы про шыроку публіку Угорьска на тему вопросів російской і польской літератур.

І кідь ся Ігнаткови не дарило засновати русиньскы новинкы, быв знаменитым языкознателём. Ёго науковы роботы о вопросах общого і славяньского языкознательства выходили у 1860-ых і 1870-ых роках у мадярьскім журналї „Országos tanáregyleti kőzlőny“. Інтелектуалны заінтересованя Ігнаткова были бырз шырокы – од проблемів взаємности міджі індоевропскыма языками, впливу хрестных походів на европску културу аж по давну ґрецьку поезію. Но што є найінтересніше, якраз він быв автором першой ґраматікы ромского языка, котра была публікована в Угорьскім кралёвстві під назвов „Cigány nyelvtan“ у 1877.

Умер Юрій Ігнатков у Лученці 14. септембра 1885 р.

(Оброблене подля жрідла: П. Р. Маґочій і кол.: Енциклопедія історії та культури карпатських русинів.)