Др. Іван Бандуріч – 80

Наш юбілант із Бардеёва (нар. 7. 6. 1934 у Стриговцю, окрес Снина) є чоловіком, котрый стояв при початках русиньского возродного процесу на Словеньску по роцї 1990 і котрый у тім русї актівный до днешнїх днїв. Доволиме сі повісти, же на Словеньску ся, може, не найде чоловік, котрый бы в одношіню до новодобого русиньского возроджіня і з тым споєнама акціями, не знав ёго мено. Він быв закладателём Русиньской оброды – Реґіоналного клубу в Бардеёві, довгорічным членом Коордіначного выбору Русиньской оброды і членом Рады влады СР про народностны меншыны і етнічны ґрупы за Русинів.

Почас свого продуктівного віку І. Бандуріч пройшов рядом функцій у сферї културы, охраны културных памяток і сполоченьско-політічного жывота. Наприклад, він быв і закладателём Окресной памятковой справы в Бардеёві і довгорічным еєй директором (1971 – 1992). І кідь ся в послїднїх роках занимать главно русиньсков проблематіков, на свою бывшу професію (котру выконовав веце як 30 років), не забыв, праві наопак. І кідь є уж на пензії, все мать што важного повісти до обновлїня памяток в окресї Бардеёв, а кідь ся му дашто не любить, не ганьбить ся отворено написати і вундовано выарґузментовати. Чітателї русиньской періодічноїй пресы го барз добрї знають як актівного і крітічного доисователя, котрый вказав на многы хыбы і предлиожыв пропозіції на їх зліквідованя.

-лр-

(Скорочене. Шыршу статю о нашім юбілантови принесеме у 3. чіслї часопису Русин. Але уж теперь му ґратулуєме ку ёго округломы жывотному юбілею і желаме му вшытко найлїпше, міцне здравя і много хосенной роботы на благо Русинів і културы. На многая і благая лїта!)