ЛЕМ.ФМ мать уж 4 рокы!

З величезнов радістю хочеме поінформувати, же 1. юна 2015 року сьме одсвятковали народины проєкту, шырше знаного во світї як ЛЕМ.ФМ. Реґуларно штыри рокы в інтернетовім ефірї першы раз зазвучав сіґнал нашого радія ЛЕМ.ФМ.

Од тамтого часу вельо уж ся змінило. Спочатку мало то быти інтернетове радийо, котре буде емітувало награны перше проґрамы і ріжнорідну музыку зо світа. Головний принцип – мало быти по лемківскы, або о Лемках.

Лем же такій вид не тырвал долго. Фурт голодны дачого нового, придавали сме до ЛЕМ.ФМ поєдны цеглы до нашого проєкту.

Днес, явиско, котре называт ся ЛЕМ.ФМ, то уж не лем інтернетове радийо, хоц і в тым просторі тамто і днешнє, то два ріжны світы. Можеме ся похвалити штоденным бытьом з Вами нажыво (понедільок-пятниця), штырьома радийовыма студиями, з котрых ведеме высыланя (Ґорлиці, Краків, Варшава, Пряшів) і штоден збільшаючий ся архів награных проґрамів, котрий неодолга буде чыслил 4.000 позиций. Штоден, окрем новых премєровых проґрамів, рыхтуєме Вам нову порцию інформаций, котры можете почути і в нашым радию, і на портали lem.fm, случаючы Новины радия Лем.фм. 

Гей, на портали, бо было нам мало. Од 2013 несміло рушыли сме з портальом лем.фм+, котрий в заложыню мал час од часу інформувати о даякых важнійшых подіях з русиньского світа, але тота наша дітина оказала ся барз непослухняча і вырывна. Ани сме не спостерегли, коли зачала кричати каждий ден, а потім парураз на ден (фурт голоснійше), будучы днес штоденником, інформуючым о подіях, припоминаючым о річницях, простуючым, полемізуючым, нагваряючым, рекомендуючым, але і фурт ся розвиваючым. В вересни 2014 р. змінили сме дізайн порталю, котрий о хвилю достал вельо нового змісту і функцийональности. 2015 рік то час наступных змін, котры днес, в виді высыланого каждий тыжден нюслетера, календария подій, доступу до базы подкастів, або інтернетового склепу з книжками і платнями, творит образ, котрым гордиме ся, маючы в головах дальшы пляны розвитку.

Барз ся тішыме, же ЛЕМ.ФМ мат штораз більше слухачів, чытачів, прихыльників і приятелів. Тото тішыт найбарже, зато днес, в ден нашых уродин, хочу подякувати обом сторонам, без котрых ЛЕМ.ФМ бы не было – тым вшыткым, што нас слухают, чытают, люблят і спомагают, і тым вшыткым, што го непрестанно малюют, редаґуют, ріжут, монтуют і обробляют.

Демко Трохановскій, шефредактор ЛЕМ.ФМ