Русиньскый фестівал нелем о фолклорї

В рамках русиньского фестівалу, котрый ся одбывав послїднїй маёвый тыждень у Свіднику, одбыла ся в середу – 27. мая 2015 научно-презентачна лекція на Ґімназії Дукляньскых героїв у Свіднику під назвов: Научны і едукачны проєкты в области карпаторусиністікы. З лекціов выступила ПгДр. Кветослава Копорова, ПгД. з Інштітуту русиньского языка і културы Пряшівской універзіты (ІРЯК ПУ) у Пряшові.

Інтеґралнов частёв лекції была ай діскузія о можностях штудія русиньского языка на Словакії і в загранічу і таксамо презентація публікацій красной літературы, котрой авторами суть абсолвенты штудійного проґраму русиньскый язык і література в комбінації другого апробачного предмету. На вопросы будучіх матурантів одповідала докторандка ІРЯКПУ Мґр. Зденка Цітрякова, котра як абсолвентка штудійного проґраму русиньскый язык і література в комбінації з вытварным уменём доповнила інформації о штудійных проґрамах і їх заміряню в рамках штудія на Пряшівскій універзітї і можностях професіоналного уплатнїня по скінчіню штудія. Віриме, же дакотры зо штудентів свідницькой ґімназії будуть продовжовати свої штудії на Пряшівскій універзітї і выберуть сі апробацію учітельство русиньского языка і літературы.

Была бы то велика надїй у розвитку русиньского народностного школства на Словакії, котре стаґнує окрім іншого ай з недостатку молодых кваліфікованых педаґоґів.

-кк-, фоткы З. Цітряковой