70 років од першого выданя новинок „Руске слово“

15. юна 2015 минуло 70 років, коли вышло перше чісло новинок Русинів втогдышнёй Югославії під назвов „Руске слово“.

Штотыжднёвы новинкы друковали ся в рoках 1945 – 1967 в Руськім Керестурї а од 1968 року в Новім Садї. Од їх взнику друковали ся лем в языку Русинів Войводины і тіраж мали од 1 000 до 1 400 фалатків. „Руске слово“ было наперед в роках 1945 – 1951 орґаном „Народного фронту“, пізнїше новинкы стали ся орґаном выдавництва і друкарнї в Руськім Керестурї і од 1968 были під выдавництвом „Руске слово“ в Новім Садї.

Новинкы публіковали світовы новости і інформації о подіях в Югославії, так само і новости зо жывота містного русиньскго населїня. Од 1990 року Руске слово зачало інформовати і о подіях зо жывота Русинів у світі.

Руске слово ся од початку 1990-тых років 20-го столітя стало формално орґаном Націоналного совіту автономной области Войводина. Міджі вызначных редакторів мож зараховати Штефана Чакана, Дюру Варґу, Дюру Латяка, Любоміра Рамача, Гелену Медєші і далшых.

Колеґам журналістам з „Руского слова“ жычіть іщі много успіхів в роботї і много років выдаваня новинок.

(Жрідло інформацій: П. Р. Маґочій і кол.: Енциклопедія історії та культури карпатських русинів.)