Євґен Жупан: „Русины не мають зо стрілянём ніч!“
В суботу 11. юла 2015 проходили в Мукачові смутны події, коло котрых дішло ку стрїляню і ку людьскым жертвам. Радіо Свобода вже стигло публіковати статї, в котрых знова копе до Русинів. Непрямо вказує на Русинів як на тых, котры таксамо можуть за події в Мукачові. Про лем.фм ку тым подіям высловив ся Євґен Жупан, председа Народной рады Русинів Закарпатя.
• Суть суботнї події в Мукачові повязаны з народностныма проблемами?
– Тото не є жадный міджінародностный конфлікт. Абсолутно то з тым не є повязане. Ту на Підкарпатю вшыткы народности жыють спокійно в мірї. Наш край є спокійный. Тото суть бізнісово-кріміналны дїла. Хтось хоче міджі собов перероздїлити сферы вливу. Події зо суботы, котры скінчіли траґічно, суть повязаны з тым. Тоты ґрупы то, самособов, хотять схосновати і в політічных цїлях, повісти, же то повязано з народностныма вопросами, но абсолутно то з тым ніч не має.
• Радіо Свободда публіковало дві статї, єдну од Олександра Гавроша, другу од Петра Кралюка, в котрых ся знова назначує, же Русины суть сполуодповідны за події в Мукачові.
– Абсолутно ніт. Такы „гаврошы“, котры цїлый час гавкали і гавкають на Русинів, они лем выповнюють свій проґрам, котре не має жадны фундаменты, не має фактів. Вже неєден раз зробити провокацію проти Русинів. То лем указує, же они неспособны економіку піднимати, демокрацію піднимати, просто ніч, і теперь глядають „ворога“. За 25 років доказали лем то, же ся нашли на посліднім місцю в Европі. Так теперь їм Русины перешкоджають. Хоць Русины неєден раз указали їм, же суть законопослушны так, же такых людей треба глядати. Гаврош не має першыраз антирусиньскы выпады. Є то знамый русинофоб, котрый выповнює якусь спеціалну задачу, котра офіціално кривдить Русинам.
• Яка є моментално сітуація в Мукачові?
– Ту моментално сітуація спокійна. Боёвници (Правого сектора – позн. редакції) втїкли десь до гор. Там їх переслїдюють. Мы не знаме, де властно конкретно пішли. То є барз, барз плано, же до такого дішло в нашім краю. Але то є лем дзеркало того, же нестабілна сітуація є в цїлій державі і не рїшыть ся тота сітуація. Без контролы продовжує война, без контролы роздавають ся збранї. Як правоохрана не має в руках контролу, то лем на хосен дестабілізації і такым подіям, котры можуть стати ся в хоцькотрій области Україны. Барз мі жаль, же в нашім краю, де люди жыють в мірї і в злагодї, дішло ку чомусь такому.
За розговор дякує Петро МЕДВІДЬ