Гуменьскый музей здіґіталізовав творчость Ореста Дубая і церьков із Новоселицї

Проєкт діґіталізації історічных артефактів у режії Пряшівского самосправного краю здокументовав і інтересны части експозіції Вігорлатьского музею в Гуменнім. Край залучів до проєкту цїлково сім музеїв, котрых є зряджователём. Міджі артефакты, котры ся діґіталізовали в гуменьскім музею, належыть і деревяна церьков із Новоселицї або творы вызначного маляря- ґрафіка русиньского походжіня Ореста Дубая.

 

Як пише словацькый дневник „Korzár“, найтяжшов была діґіталізація деревяной церькви із Новоселицї і внутрїшного выбавлїня той церькви, котра днесь стоїть в сканзенї в Гуменнім. Діґіталізаціов перешли і далшы артефакты повязаны з Русинами. Іде наприклад о монеты з епохы Римской імперії, котры ся нашли в русиньскім селї Калинів, ці стріберный поклад із Тополї, села, де ся народив Александер Духновіч.

 

Діґіталізаціов перешли і творы вызначного маляря-ґрафіка русиньского походжіня Ореста Дубая. Академічный малярь, проф. Орест Дубай народив ся 15-го авґуста 1919 р. в селї Велика Поляна і умер 2-го октобра 2005 р. в Братїславі. Належыть міджі найвызначнїшых ґрафіків на Словакії у 20-тім сторочу. Од 1959 р. мав выставкы дома і за граніцями. Ёго творы могли любителї уменя відїти наприклад в Берлінї, Будапештї, Ростоку, Баґдадї, Кагірі, Варнї, Уланбатарі, Москві, Флоренції і далшых великых містах. У 1977 роцї му быв удїленый тітул Народного умелця і Велика премія Бєнале словацькой ґрафікы в Баньскій Быстріцї. У 1981 роцї здобыв премію „Ex aeguo сучасной словацькой ґрафікы“.

 

(На фотоґрафії: Орест Дубай: Прінціп ІІ).

П. M.

Go back