Виноваты

11-го юла 2015 р. в Мукачеві одбыли ся траґічны події, котры якбач нихто не хоче зажыти. В дотеперь покійній Закарпатьскій области Україны дішло ку стріляню міджі „патріотами“ із Правого сектора і „прихыльниками“ народного посланця Україны Михайла Ланя. Траґічна субота, яка на дакотрых фотоґрафіях вызерала як із фронтовой лінії, має і свої людьскы жертвы.

Самособов, як російскы, україньскы, так і світовы медії, такой зачали рїшыти вопрос того, ці зачінать на Підкарпатю сітуація така, яка є і на выходї державы. Подля гесла, же найвекшу кількость чітателів забеспечіш пошырёванём страху і депресії. Но покля Україна глядала правы причіны суботнёго інціденту, котрый якбач, подля остатніх інформацій, не быв ничім іншым як боём о сферы впливу в бізнісо-кріміналній діятельстві з конрабандом, голос демокрації, плаченый Сенатом Споєных штатів Америкы, вже причіны публіковав. І то такой з пера аж двох кріміналістів, одборників на тоту тему.

Наперед, день по інцідентї, статю Петра Кралюка, і в понеділок статю вже добрї знамого „любителя“ Русинів Олександра Гавроша. Обидві статї мають сполочный елемент. Не жебы прямо, але шумнїі в шкатульцї з пантликом чітателёви підопхають думкы о тім, же властно Русины, в їх очах лем „політічны Русины“, кідьже такого народа ніт, котры суть, самособов, фінанцованы споза граніць, суть сполуодповідны за тото, што ся в суботу в Мукачові стало.

Народный посланець Україны Микола Княжицькый ішов на своїм профілї на соціалній сїтї іщі далше, кідь то подав без той шкатулькы і пантлика і пише, же на Підкарпатю мають Русины „свою армаду“, котру Українцї могли в суботу відїти, свою церьков, котра є незалежна од Україньской ґрекокатолицькой церькви, і што є найлїпше, же тото вшытко, значіть Русинів, хтось підпорує за грошы із контрабанду.

То, же Русины суть плачены Москвов, Америков, і не знам кым вшыткым, то знаме, бо такы обвинїня уж на головы Русинів были нераз. Княжицькый іде але в жанрі sci-fi іщі далше, кідь властно пише, же контрабанд, котрый довгы рокы фунґує і дотеперь з тым Київ ніч не робив, тадь собі лем спомяньме – як были покараны будователї метра на штреці Ужгород – Вышнє Нїмецьке, тот контрабанд, то справа, котра никому іншому не зараблять грошы лем русиньскому руху. Ідучі в тій лінії лоґікы, можеме властно прийти до того, же кідь з контрабандом дотеперь даяк Київ не боёвав, Києв властно підпоровав русиньскый рух.

На тім цїлім розумному чоловіку зіставать розум стояти коло двох справ. Тов першов є, ці досправды панове конґресмены хотять і далше платити грошы жытелїв Споєных штатів Америкы на редакцію радіа, котре не першыраз копало до Русинів. До народа, котрый не мать своёй державы, котрый никому не уближує, навспак, довгы десяткы років ся уближовало і на Українї аж дотеперь уближує ёму, і він ся не мать як бранити. Бо перед ёго проблемами є глухый і слїпый цїлый, іншак демкоратічный, світ, котрый честує людьскы права і свободы. Но одповідь на тот вопрос якбач буде такый, же гей, же то конґресмены хотять платити. Бо на тото копаня Радія Свобода до Русинів вже была звернута їх увага представителями Русинів у Северній Америцї. Лемже реторіка Радія Свобода ся даяк не змінила.

Тов другов справов є, ці досправды україньскы політіци, націоналісты і русинофобы думають, же донеконечна їх невалушность піднимати державу, економіку, демокрацію, можуть оправдати так, же будуть глядати причіну вшыткых проблемів ув Русинах, котры іншак не екзітують, лем втогды, як на дакого треба звалити вину. Бо кідь гей, і люди їм тото зъїдять а із танірём, то дам руку до огня за то, же потім є Україна на дразї хыбаль так до нещастя, а не до Европы.

Україна бы ся в першім рядї мала збавити своїх мафіянів і екстремістів. І взяти їм збранї. І потім досправды зачати робити на тім, жебы піднимала жывот жытелїв державы. Як раз мафія, екстремізм і політічне ничнероблїня, то суть елементы, котры суть виноваты за то, де ся держава находить, не Русины. І демократічный світ бы уж мав перестати быти тихо, кідь досправды має інтерес на тім, жебы Україна залучіла ся до нёго.

P.S.: 16-го юла 2015 в україньскім парламентї говорили о законї, котрый бы мав Донєцькій і Луганьскій областям забеспечіти якыйсь шпеціалный сатус – автономію. То є компроміс з тыма, котры зо збранями в руцї зачали войну, котры зробили референдумы, якы демократічный світ і Києв не узнавать. Інтересне, же покля Русины од 1991 року кличуть по основных людьскых правах і по наповнїню референдума, котрый Києв сам выголосив, є законный і платный, так жаден компроміс Києв дотеперь не зробив, і кликаня Русинів без зброї, мірным способом, не мало жаден ефект. Властно мало. Україньска юстіція одсудила Димитрія Сидора. Так ся заобходить зо законопослушныма жытелями – Русинами. Просто, сьме виноваты.

Петро МЕДВІДЬ