Криніцькый кeрмеш – 1000-річа од смерти св. Владиміра

28. юла 2015 р. в криніцькій православній парафіі проходив кермеш в день св. Рівноапостолного князя Владиміра. На тогорічный праздник пришли гостї з цїлого світа, затоже была то 1000. річніця смерти покровителя криніцього храму і централны святкованя той річніцї через Польску автокефалну православну церьков.

Службу Божу провадив Блаженїшый Сава (на фотцї П. Басалыґы другый злїва), митрополіта варшавскый і цїлой Польщі, вєдно з владыками з северных єпархій – Высокопресвященїшым Яковом, архієпіскопом білостоцькым і ґданьскым і Преосвященїшым Ґриґріом, єпіскопом супрашльскым і вікарьным владыком перемышлско-новосандецкой єпархії, Преосвященїшым Паісіом, єпіскопом ґорлицкым. Почас архієрейской Літурґії св. Іоана Златоустого співав хор містной парафіі, веденый Петром Трохановскым і, гостинно молодежный хор із Білогостоку.

Тогорічный кермеш быв богатый і на іншы події – дотеперїшня уліця, при котрій находить ся криніцька православна церьков, рїшінём містных властей, здобыла званя св. Владиміра, о што старали ся уж пару років єп. Паісій вєдно з парохом о. прот. Петром Пупчіком і парафіянами.