На многая і благая лїта, владыко!
14. авґуста 2015 Высокопреосвященый кир Адам, архієпіскоп перемышляньскый і новосандецькый ославив 89 років.
Владыка Адам (Александер Дубец) народив ся 14. авґуста 1926 року в лемківскым селї Флоринка на запоаднїй Лемковинї. Почас ІІ. світовой войны учів ся в Україньскій учітельскій семінарії в Криніцї. До 1960 року быв штудентом Православной дховной семінарії у Варшаві а пак в 1964 роцї закінчів штудії на Хрістіаньскій богословскій академії у Варшаві.
В 1965 роцї быв рукоположеный владыком Юріём (Кореністовом) а пак направленый до душпастырьской послугы на Лемковину до села Высова і до Кальникова. Од 1966 року быв парохом саноцькой парафіі і деканом саноцького деканату.
30. януара 1983 року быв хіротонізованый в сан єпіскопа, остаючи вікарьным владыком варшавской єпархіі – тогды, як єпіскоп люблиньскый. З днём 29. септембра 1983 р. єп. Адам быв призначеный на саноцьку катедру, реактовованой по такой 300 роках, православной перемышляньско-новосандецькой єпархії а в 1996 роцї піднесеный до функції архієпіскопа.
Православна перемышляньско-новосандецька єпархія чіслить днесь 3 деканаты, 17 парафій, 25 священиків і 1 монастырь. Чысло вірників коло 3000. Суть то головнї люде і іх потомны, котрым по 1956 роцї пощастило ся вернути на землю, з котрой были выгнаны злочіннов Акціов «Вісла». Хоць то найменьша єпархія ПАПЦ, цїлый час ся она розвивать. Доказом того было, і дальше є, шыроке діяльство владыкы Адама на Лемковинї. Ёго старанём покликано до жывота новы парафіі і побудувано новы церькви, м. ін. в Ґорлицях, Ряшові, Білянцї, Реґєтові, Криніцї або перенесено святыню до Розділя. Варто спомянути, же завдякы владыкови Адамови в 1985 роцї высвячено в Зіндрановій першый по ІІ. світовій войнї православный храм на Лемковинї. Подарило ся тыж побудовати каплицю в Тыляві, на місцї, де даколи стояла православна церьков, як тыж побудовано на ново команецьку церьков, котра згоріла в 2006 роцї.
Архієпіскоп Адам обнопвив тыж Мужскый православный монастырь Покровы Пресвятой Богородіцї у Высові, Центер православной културы «Елпіс» в Ґорлицях ці Православный центерк Милосердя «Елеос» в Ґладышові. Владыка Адам быв ініціатором канонізації о. Максима Сандовіча. Быв тыж ініціатором друкарьского діяльства в реактовованій єпархії – в Саноку, де выдаваный є „Церковний Календар“ і часопис „Антифон“.
В 2010 роцї владыка Адам быв оцїненый через Україньску православну церьков Московского патріархату Орденом св. Петра Могылы а в 2011 роцї презідент Україны Віктор Ющенко вручів му Орден Князя Ярослава Мудрого (V. ступеня).
Владыко, приймийте ... щіры желаня довгых років жывота в добрім здоровю і Божій помочі в несїню душпастырьской старостливости над Лемковинов. На многая і благая лїта!
Северіан КОСОВСКЫЙ, Радіо лем.фн