85. річніця народжіня Ярослава Поляньского

15. авґуста 2015 минуло 85 років од народжіня вызначного етноґрафа, діріґента, композітора і аніматора културы – Ярослава Поляньского.

 

Ярослав Поляньскій народив ся 15. авґуста 1930 р. у лемківскім селї Поляны коло Криніцї (западна Лемковина). В 1947 р., як векшына Русинів, котры остали ся на Лемковинї, вєдно з родічами быв выселеный на западны землї Польщі в рамках неславной Акції «Вісла».

 

По скінчіню в 1954 р. педаґоґічного ліцею і музичной школы од 1956 р. учіть музику в школах Зеленогірщіны і уж тогды записує од Лемків велё пісень і веде першы лемківскы хоры. Пак зачінать науку в Музичній академії Ф. Шопена у Варшаві, котру кінчіть в 1964 р. маґістерьсков дізертаіов під назвов Характеристыка лемківской пісні“.

 

Жывот Ярослава Поляньского проходив у тяжкім про Лемків періодї, коли културне діятельство могло проходити лем під контролёв україньскых орґанізацій, акцептованых тогды комуністічныма властями, зато векшына ёго професіоналной музичной карьєры одбывать ся через веджіня україньскых хорів, але і до їх репертоару вводить велё русиньскых пісень, котрых в своїм жывотї обробив і записав (вєдно з варіантами) коло 5000.

 

Найвекшый успіх як діріґент здобывав з основаным в 1972 р. мужскым хором „Журавлі“, котрый діяв під крылами „Украіньского Соспільно-Культурального Товариства“, але по 11 роках веджіня і вынесїню на найвысшу музычну уровень, в неприємных подмінках зо стороны верхушкы, перестав ним діріґовати. Потім вів іщі церьковны і іншы хоры.

 

Ярослав Поляньскый быв многократно нагородженый різныма преміями, наприклад у 1966 р. Міністерством културы ПР, котре признало му названя «Заслужений діяч культуры».

 

Вмер 15. марца 1994 р. в Отвоцку коло Варшавы і там є похованый.

 

Демко ТРОХАНОВСКЫЙ

Go back