Архієпархіяльный одпуст быв у русиньскым селї Чірч

В днях 29. – 30. авґуста 2015 в селї Чірч на Пряшівскій Руси проходив архієпархіяльный грекокатолицькый одпуст почас свята Успіня Пресвятой Богородіцї.

Праздник зачаву суботу 29. авґуста процесіов зо села на Маріяньску Гору, де по посвячіню воды, молитвах, проповідї і Святій Літурґії вірници зышли до села, жебы одслужыти панахіду при гробах чірчаньскых парохів, а пак од 21.00 год. вечурню в тамтешній ґрекокатолицькій церькви Покровы Пресвятой Богородіцї.

Другый день свята, в недїлю, од самого рана в чірчаньскій святынї быводслуженый Акафіст ку Пресятій Богородіцї, Божественналітурґія а пак ішла процесія на Маріяньску Гору, місце, де ся, подля записів у парафіялній кроніцї, двом дівчатам обявив ся старець, котрый вопхав до землї палицю. З того місця вытріскла вода, яка мала оздоровляючу силу. Пак старець наказав поставити при жрідлї каплицю.Дівчата повіли селянам, што ся стало на горі, але люде їм не повірили. Потім на село пришла катастрофа – великы заплавы, і аж тогды люде рїшыли збудовати на тім місцю каплицю Успеня Пресвятой Богородіцї.

На святій горї быв одслуженый Акафіст благословлїня родин і свято скінчіло Торжественнов літурґіов, в рамнках котрой быв Обход коло церькви і Мірованя.

Чірч то перше русиньскє село за польсков граніцёв (гранічіть з лемківскым селом Лелюхів), з тойже причіны перед выгнанём русиньского населїня з Лемковины, велё Лемків з той части Лемковины ходило на праздникы на Пряшівску Русь, окрем, іншого і до сусіднёго Чірча.

Северіан КОСОВСКЫЙ