Ян Фіґель навщівив Закарпатя. Люди споминають на Чехословакію

Як інформує Пресова аґентура Словацькой републікы (TASR), підпредседа Народной рады Словацькой републікы і председа Хрістіаньско-демократічного руху (KDH) Ян Фіґель в четверь 13-го авґуста 2015 р. навщівив Закарпатьску область Україны. Приятый быв председом Закарпатьской областной рады Володиміром Чубірком і Михайлом Рівісом. Їднаня дотуляли ся сітуації на Українї і в сусїднїм реґіонї Словакії, як і словацько-україньской реґіоналной сполупраці.

Представителї обидвох держав окремо бісїдовали о процесї придружіня Україны до Европской унії і дослїдків сучасного конфлікту на выходї Україны. Подля слов Яна Фіґеля є веце як 10-річне членство Словакії в Европскій унії хосенным і є предпокладом і про приближованя Україны ку зъєдиненій Европі. Представителї были згодны на потребі проглубіня економічной сполупраці, головно у области енерґетікы. Україна є вдячна за вытворїня можности додаваня ґазу реверзом зо западу. Фіґель повів, же бы веце про злїпшіня розвитку мали зробити самосправы Пряшівского і Кошыцького высшого адміністратівного цїлку і Закарпатьской области, жебы через хоснованя еврофондів были модернізованы гранічны переходы, транспортна інфраштруктура, но і условія про розвиток черезгранічного бізнісу, турістікы і културы. Як повів председа KDH Ян Фіґель, люди на обидвох боках граніцї памятають собі сполочну історію і споминають на чехословацькы часы.

Ян Фіґель навщівив і єпіскопа русиньской Мукачовской ґрекокатолицькой єпархії преосвященого владыку Мілана (Шашіка). Подля Фіґеля є Україна найвекшым сусїдом Словакії, но значіню і потенціалу той державы не зодповідать рівень і россяг словацько-україньскых односин. „Напрік войновому конфлікту на выходї державы, є много причін на зінтензівнїня сполупраці Словакії з Українов,“ повів Фіґель.

П. M.