Занедовго буде IV. Міджінародный конґрес русиньского языка

З нагоды 20. річнiцї святочного выголошiня кодiфікацii русиньского языка на Словакії (писали сьме о тій події ту), 23. – 26. септембра 2015 р. у просторах Пряшівской універзітыв Пряшові буде проходити IV. Міджінародный конґрес русиньского языка. То научна конференція, в якій возмуть участь вызначны науковцї-бадателї: славісты, лінґвісты, історіци, журналісты і практічны поужывателї русиньского літературного языка. Конґрес отворить доц. Анна Плїшкова, директорка Інштітуту русиньского языка і културы ПУ і проф. Петер Коня, ректор Пряшівской універзіты, а темы запланованых рефератів будуть охоплёвати велё проблемів сучасного русиньского языка і будуть задїлены до штирёх тематічных секцій:

  • Статус русиньского языка в шыршім лінґвістычнім контекстї.
  • Актуалны лінґвістычны проблемы русиньского языка в окртемых державах.
  • Русиньскый язык в окремых функціоналных сферах.
  • Русиньскій язык в школьскій сістемі Словакії і другых державах.

На конґрес, окрем учітёелїв Інштітуту русиньского языка і културы Пряшівской універзіты, прийдуть репрезентанты вшыткых найважнїйшых центрів русиністікы во світї, але і другы бадателї, котры занимають ся русиньскым языком у своїй научній роботї. Свою участь підтвердили такы вызначны науковцї, як: проф. Павел Роберт Маґочій (Канада), проф. Ахім Рабус (Нїмецько), проф. Генрик Фонтаньскій (Польща), др габ. Олена Дуць-Файфер (Польща), проф. Михаіл Капраль (Мадярьско), проф. Михайло Фейса (Сербія), проф. Елена Будовская (США), Мґр. Михайло Алмашій (Україна) і другы бадателї і практічны поужывателї русиньского літературного языка.

Попри конґресї ёго участници будуть мати нагоду відїти выступлїня єдиного во світї професіоналного русиньского театру – Театру Александра Духновіча в Пряшові, котрый зачінать свою юбілейну 70. театралну сезону, як і выставку русиньскоязычной літературы і презентацію найновшых выдань з областри карпаторусиністікы.

Демко ТРОХАНОВСКЫЙ

Go back