Словацькый посланець хоче День героїв Дуклї. Говорить о „Русинах-Українцях“

Як 1. септембра 2015 інформовала Пресова аґентура Словацькой републікы (TASR), посланець Народной рады Словацькой републікы Віліям Ясань, за владну соціалнодемократічну партію „Smer-SD‟, предложыв пропозіцію на новелу закона о державных святах і днях робочого покоя з тым, же хоче встановити 6. окробер як памятный день під назвов День героїв Карпато-дукляньской операції.

В минулости ся тот день святковав як День Чехословацькой народной армады, в сучасности є то день присвяченый жертвам Дуклї, а не героям Дуклї, пояснёвав посланець.

„Дукля є про Ясаня стратеґічным місцё 20-го стороча. В першій світовій войнї ту проходили тяжкы бої міджі російсков і австро-угорьсков армадами. Памятков на тоты бої суть цінтерї павшых вояків в Ладомировій, Свіднику, Вышнїм Мирошові, Дубовій, Юрковій Волї, Цернинї і в далшых піддукляньскых селах‟, повів про TASR Ясань.

Словацькый посланець парламенту, напрік тому, же на Словакії є вызнана окрема русиньска народностна меншына, не розрізнять Русинів од Українцїв і інформовав TASR о кількости „Русинів-Українцїв“ в Першім чехословацькім армаднім корпусі армадного ґенерала Людвіка Свободы, котрый воёвав на Дуклї.

„До зачатку Карпато-дукляньской операції го творило (армадный корпус, позн. редакції) веце як 16 тісяч жен і хлопів. З того Словаків было коло 20 процент, Чехів 44 процент і Русинів-Українцїв 24 процент,“ повів про аґентуру Ясань.

Переломлїя нїмецькой дефензівы подарило ся як раз 6. октобра 1944 року. Зато 6. октобер має быти подля новелы закона, яка є передкладана на септемброве їднаня словацького парламенту, день присвяченый героям Дуклї.

П. М.