Снина привітать 30 умелцїв із 20-ёх держав

Од 6-го септембра до 18-го септембра 2015 р. буде проходити уж 22-ый річник Міджінародного малярьского фестівалу в Снинї.

Фестівал од 1994 р. орґанізовала напаред Ґалерія Miro і пізнїше Andrej Smolak Gallery. Цїлый час ся о фестівал у Снинї старать якраз Андрій Смоляк, академічный малярь русиньского походжіня, котрый окрім іншого має в містї Снина і пріватну основну умелецьку школу.

Того року на фестівалї буде брати участь 30 умелцїв із 20-ёх держав світа. Мож спомянути од нам близкых держав, як Польша, Білоросія, Росія ці Сербія, аж по такы екзотічны державы, як Татарстан, Кірґізія, Ірак або Баграйн. Почас цїлого пленеру можуть люди ходити і смотрити, як каждый день під руками малярїв выникають новы умелецькы творы іншпірованы місцём, простором, часом, котрый будуть умелцї в Снинї пережывати.

15-го септембра буде проходити выставка образів під голым небом. На Сниньскый камінь малярї вынесуть свої образы, котры там будуть выставлены од 11.00 год. до 13.00 год. До вынесіня образів ся можуть залучіти і люди. Каждый, хто вынесе єден образ на Сниньскый камінь, дістане купон, за котрый в Ґалерії Андрія Смоляка потім дістане репродукцію єдного із образів. На подію сердечно позываме.