Помагать дїтём обявити русиньскый язык

В сучасности не є велё книжок про дїти в русиньскім языку. По правдї, є їх лем пару, но ани тоты не можеме найти на продайных пультох. Русиньскы дїти мають обмеджены можности як дїстати ся ку лїтературї в рoднім языку, зa помочі котрой можуть обявовати ёго красу. Обчаньске здружіня тота аґентура уробило крок, котрым проблем доступности єдной книжкы вырїшило. В року 2013 выдало а недавно зарадило до продая на Словеньску дїтячу книжку Подьте, дїти, што вам повім написану в русиньскім языку од авторкы Людмілы Шандаловой.

 

Де заспало курятко? Яка є жывотня правда старого коцура? Што вам порадить сова? Што мать в шпайзу вовірка? Чом мать заяць великы уха? Є мышка добра ґаздыня? Хто в лїсї діріґує орхестер? Одповідї на тоты вопросы суть поступнї одкрыты в 28-ёх приповідках зо світа звіряток. Інтересны віршы в русиньскім языку суть доповнены переписанём в латиніцї. Дїтём од найменьшого віку, їх родичом або старшым сородинцём кромі забавы помагають розвивати словну засобу. Ілюстрації тематічно допроваджають вшыткы віршы; за симболами в їх ґрафічнім выядрїню є снажіня розвивати абстракцію думок у молодого чітателя.

 

За успіхом першого выданя, котре служить як помічный матеріял у навчалнім процесї в матерьскых і основных школах на выходнім Словеньску, тота аґентура недавно выдала актуалізоване друге выданя. Книжку сі може купити в інтернетовых обходах www.kompot.sk a www.martinus.sk, або в обходї ЦД на пішій зонї у Свіднику.

 

П. М.

1. Обалка книжкы про дїти, котра вышла уж у другім выданю і мож ю купити через інтернетовый обход.

2. Єдна ілустрація Бранїслава Шандалы з книжкы Подьте, дїти, што вым повім.

3. Ілустрація з книжкы з укажков русиньского тексту в азбуцї і латиніцї.

 

Go back