• Aкадемія
  • Новинкы • 41/2015
  • В окресї Свідник доповнять русиньскы означіня (позн. ред.: лем, жебы были ґраматічно правилны!)

В окресї Свідник доповнять русиньскы означіня (позн. ред.: лем, жебы были ґраматічно правилны!)

Подля інформацій порталу „e-dukla.sk‟ в окресї Свідник є 66 сел. В тых селах, де є над 20 процент Русинів із цїлковой кількости жытелїв, мусить подля закона быти по русиньскы означена назва села, селькскый уряд (позн. ред.: але правилно є і сільскый уряд, тыж містьскый уряд, а нияк інакше!), ці далшы інштітуції. В многых селах ся закон о двоязычнім означіню не дотримовав.

Мілош Стрончек, русиньскый актівіста і учітель русиньско языка, выразив ся, же є то хыба старостів, котры собі не повнять свої обовязкы. Єднако є то подля Стрончека і вина посланцїв, котры не дотисли старосту, жебы наповнив законный обовязок і сповнив тото, што є про Русинів пріорітов, „жебы сьме были чітательны і видительны всягды, де сьме, на цїлій теріторії Словакії,“ закінчує Стрончек.

Староста Вышнёй Ядльовой о проблемі знає. Про портал повів, же на порушованя закона обернув ёго увагу Уряд влады СР. Означіня сельского уряду і села у Вышнїй Ядльовій не є, но староста говорить, же є у функції новый і о обовязку не знав. В найблизшых днях ся має дати вшытко на порядок. Староста Мірослав Чепан далше повів, же контактовав і старостів далшых сел і довєдна глядали путь, як закон наповнити штонайефектівнїше.

Проблем рїшыть і старостка села Нижнїй Мирошів Даріна Кеселицёва. Тота про портал повіла, же знать о тім, же ся порушовав закон. Кідьже ї на то звернув увагу Уряд влады СР, хоче до встановленого терміну табліцї з русиньскым означінём дати на своє місце.

О проблематіцї в остатніх днях інформовали і „Podduklianske noviny‟. Марта Сібалова із пресового оддїлїня Пряшівского самосправного краю про новинкы повіла, же по зробленій контролї будуть подля закона приданы русиньскы табліцї і в селах Гавранець і Бодружаль. Табліцї хыбовали і в Юрковій Волї, де ся тото недотримованя закона вже вырїшыло і хыбуючі табліцїбыли в остатнїх днях доданы.

На недотримованя закона в русиньскых селах перед часом звернув увагу Уряду влады Словацькой републікы Ян Липиньскый зо Здружіня інтеліґенції Русинів Словакії. Русинскы означіня не хыбовали лем в окресї Свідник. В многых селах є і така сітуація, же табліцї суть, но не суть правилны (познм. ред.: єдинов компететнов інштітуціов говорити о правилности означіня сіл, припадно там іщі все суть україньскы табліцї, котрыма ся означовало перед 1989 роком.

Петро МЕДВІДЬ

Go back