Михайло Алмашій ославив 85 років свого жывота – на многы і благы лїта!

2. октобра 2015 ославив85 років свого жывота Михайло Алмашій, русиньскій діятель з Підкарпатьской Руси, довгорічный председа Общества Александра Духновіча, учітель, академічный выкладатель, языкознатель, лінґвіста, діріґент і, хоць мало хто о тім знать, актівный в минулости шпортовець.

Народив ся Михайло Алмашій 2. октобра 1930 р. у селї Ромочевиця к. Мукачова (тогды Підкарпатьска Русь в рамках Чехословакії) у многодїтній родинї. В роках 1941 – 45 учів ся в мукачовскій ґімназії, а в роках 1949 – 54 штудовав російску філолоґію на Ужгородьскій універзітї. 43 рокы быв учітелём середнёй школы. Опублікувал коло 80 статей із области педаґоґікы.

Є автором сучасной ґраматікы русиньского языка і велё іншых русиністічных робот. Доднесь бере актівну участь в процесї кодіфікації підкарпатьского штандарду русиньского языка, пишучі і фурт выдаючі новы книжкы, словникы і лексіконы.

Михайло Алмашій представив «Русинсько-славянськый лексикон» почас IV. Міджінародного конґресу русиньского языка на Пряшівскій універзітї в Пряшові (2015).

Послїдню свою роботу – „Русинсько-славянськый лексикон‟ указав на IV. Міджінароднім конґресїрусиньского языка, котрый проходив 23. – 25. септембра 2015 року в Пряшові. То величезна, высше 600-сторінкова книга, в котрій, окрем обшырнїшого вступу з характерітіковокремых языків, зоспоставлять русиньску лексіку попри білорускых, украіньскых, російскых, польскых, словацькых, чеськых, булгарьскых, сербскых, словеньскых і македоньскых одповідниках.

Желаме Вам, пане Михайле, вшыткого доброго, дуже здоровя і силы в каждоденній роботї!