Адресат незнамый
Быв єм участный послїднёго засїданя Світового конґресу Русинів, котрый проходив минулого рока на Підкарпатю. Представитель Северной Америкы у своїм прослові окrем іншого повів, же Русины в Америцї не знають, хто, коли і на основі чого змінив назву конґресу, кідь зразу зачала ходити пошта і выголошіня од Світового конґресу Русинів/Руснаків/Лемків і од Світовой рады Русинів/Руснаків/Лемків.
Самособов, то спустило велику діскузію, согласны і несогласны погляды. Головнo зато, же пунктом проґраму засїданя была і зміна штатуту (станов СКР). Сам єм ся намагав пояснити, же локалны етнонімы ся можуть дале хосновати, можуть быти тоты етнонімы вырахованы в преамбулі штатуту, мають в окремых державах свої значіня, але як єден народ, мусиме мати єден конґрес, котрый має про наш народ єдну назву. На конґресї ся прияв новый штатут, проти котрого сьме были мала опозіція, але веджіню конґресу ся не подарило основне дїло. Конґрес не дістав нову назву і зістав Світовым конґресом Руснів. Так, як быв і основаный. Не подарило ся то веджіню так, як ся то веджіню не подарило уж перед пару роками, і зато мі тоты намагы пришли на Підкарпатю як нелоґічны, кідьже на конґресї тот проблем уж быв продіскутованый давнїше.
Конґрес є доднесь зареґістрованый на Словеньску як обчаньске здружіня, котре має назву Світовый конґрес Русинів. Напрік тому, кідь было дашто, што єм почас тогорічного бєнале в Криницї уж не быв годен довкола слухати, то не были фалошны тоны дакотрых ансаблїв, і то ся ставать, але тісячраз повторяна назвы Світова рада Русинів/Руснаків/Лемків, Премія Василя Турка Гетеша, котру вручать Світова рада Русинів/Руснаків/Лемків за вклад до културы Русинів/Руснаків/Лемків ітд. аж натілько, же одходжаючі зо салы єм уж ани не знав выдкы єм, што єм, яка то култура і што то за Світова рада.
Не буду знова і знова пояснёвати, чом Світовый конґрес Русинів мусить зістати Світовым конґресом Русинів і не мож з назвы робити жадну федерацію, конфедерацію ці іншы „неманжелскы“споїня. Меншына, котра за зміну назвы была, мусить прияти, же была меншынов. Же векшына роздумує іншак. Тота меншына але вєдно з тым, же єй членове сидять у Свтівой радї, має якбач чутя, же є векшына і зъявують ся єй фатаморґаны, котры єй шептають до уха, же зміна назвы была одобрена. Покля іде о галуцінації, котры тоты люди не знають овпливнити, пак є то тот лїпшый припад.
Тот гіршый припад є, же нихто з них жадны галуцінації, котрым бы ся не знав боронити, не має, але свойвольно порушують штатут Конґресу, основный закон орґанізації, котрой суть найвысшыма фукціонарями. Што іщі гірше, то сітуація, же кідь бы законы переступив політік, быв бы то ёго конець, єднако як бы то быв якбач конець каждого єдного лідра даякой орґанізації, але у Світовім конґресі Русинів є каждый тихо, никому ся то не хоче рїшати і меншына конґресовых делеґатів днесь рядить векшынов.
До максімалной абсурдности то дотягла Комісія про освіту Світового конґресу Русинів, котра мала почас бєнале в Криницї своє засїданя. Подля інформацій Рутенпресу ся комісія доїднала на тім, же ся буде робити словник русиньского-руснацького-лемківского языка і выготовить ся методолоґія навчаня русиньского-руснацького-лемківского языка. Честованы, знать мі хтось пояснити, што то за словник будеме мати?! І што за методолоґію?! Тот словник буде якбач такый, як і цїлый конґрес.
Світова рада в Криницї ся доїднала на тім, же зажене далшы писма україньскым орґанам і Европскому парламенту, жебы узнати Русинів на Українї. Звідам ся, кому має прийти одповідь? Бо офіціално Світовый конґрес Русинів/Руснаків/Лемків не екзістує. Про мене є такый адресат незнамый. А каждій добрій поштарьцї є тото ясне таксамо. Жаль, же нашій презідії не є!!!
Петро МЕДЕВІДЬ, Пряшів
(Статя была написана як коментарь „Вступне до контроли“ лемківского радіа lem.fm)