Стріча єдной фамілії в Америцї

Зачатком 20. стороча ся велё нашых людей выстїговало за роботов до Америкы. Так зробили і трёме братове з Воліцї – Андрій, Михал і Ян Глогінцёвы. Наймолодшый Ян ся по часї вернув, але Андрій з Михалом зістали і заложыли собі там родины. В юли 2014 року вырїшыли америцькы потомкове братів Глогінцёвых зорґанізовати велику стрїчу в містї Піттсбурґ.

Участны той стрїчі сьме были і мы – родина Ясикова з Воліцї, бо Ян Глогінець быв моїм прадїдом. Цїла стрїча тримала три днї а зышло ся нас там высше 70 участників.

Першый день сьме ся переплавили лодёв по Піттсбурґу і ближе сьме ся спознали. Другый день сьме навщівили містечко Ню Салем, де жыв Михал Глогінець з родинов а ту є і похованый. Нашли сьме і ёго хыжу, але в нїй уж жыє дахто другый. Пообідї сьме в парку мали погощіня, котре нашов русиньсков музиков сприємнили мій отець з моёв сестров Станїславов вєдно з Діном Полоком , котрый є там главныв редактором русиньского радія і ёго предкы походять з Рокитова коло Гуменного. В недїлю сьме были участны на Службі Божій в Ґрекокатолицькій церькви святого Ґріґорія Богослова. Послїднїм актом нашой стрїчі быв сполочный обід в церьконій їдалнї. Постарав ся о нёго Джон Ріґетті, бывшый председа Карпаторусиньского общества з центром у Піттбурґу. Наперед вшыткым притомным росповів курто о історії і културї тамтешнїх Русинів. Потім уж сервіровали традічны русиньскы їдла, якыма суть пирогы, голубкы, галушкы, капустніця або закручаникы.

Велика вдяка належыть вшыткым, котры ся о тоту стрїчу постарали, главно панови Алвінови Єнінґсови з Чікаґа. Він як єдиный зо вшыткых участных іщі знать бісїдовати родным языком свого дїда Андрія Глогінця.

Ладїслав ЯСИК, мол.