Знову обявленый „страченый світ“

Кідь даколи дахто буде писати історію Славяньской книжніцї (части Народной книгарнї, котра є в пражскім Клементінї), не мав бы обыйти пригоду єдной єй новой нкнижкы: недавно вышла за помочі той знаменитой інстітуції книга Страченый світ Підкарпатьской Руси (Zmizelý svět Podkarpatské Rusi). За єй взником є скоро детектівна пригода, котра єдночасно говорити о творчій інвенції і кропіткій роботї одборных працовників книжніцї.

 

Цїлы рокы лежали в депозітї Славяньской книигарнї забыты шкатулкы з неґатівам Рудолфа Гулкы, урядника, фотоґрафа і перекладателя, котрый на зачатку 20-ых років минулого строріча жыв на Підкарпатьскій Руси. Окрем повнїня урядных повинностей, фотоґрафовав тамтешню природу, людей, крої, самобытность жывота містных жытелїв. Неґатівы (не обсяговали лем фотоґрафії з Підкарпатьской Руси, але і з далшых областей ЧСР), векшынов скляняны дошкы, были обьявлены, пройджены процесом зроду фотоґрафії, ушорованы і з выберу із них выникла прекрасна нкнижка. Є, самособов, підложена  добрым одборным коментарём, даныма о жывотї о творчости автора, докладныма припомінками, бібліоґрафіов і назвами.

 

Выходить так, же послїдня річ значіла про творцїв проєкту Лукаша Бабкы і Ганы Оплештїловой множество бадательской роботы, даколи наісто аж детектівной. Области, котры Рудолф Гулка скоро сто років фотоґрафовав, вызерають днесь цїлком інакше, країна ся змінила, много ставеб не екзістує, назвы міст і уліць мають новы мена, дакотры села заникли, іншы автор фотоґрафій нияк не описав.

 

Наперек вшыткому, едіторьскому тіму, ку котрому требы придати і Онджея Гулеша, котрый книжку ґрафічно управив, ся подарило, думаме, на все потребне догляднути, вшытко ідентіфіковати, назвати. Книгу роздїлили до дакількох частей подля реґіону (Ужгород і околіця, запад, середина і выход Підкарпатьской Руси, погляды з далшых областей, де Гулка фотоґрафовав).

Є то нелем цїнне і обсяжне добове свідоцтво о „страченій земли“, але сучасно так красна книжка: листованя в ній є радостёв і зажытком.

 

Книжку мож обїднати у: vydavatelstvі@nkp.cz.

 

Анна ПІЛАТОВА, „Podkarpatská Rus, časopis Společnosti přátel Podkarpatské Rusi“, 3/2014, s. 2

Go back