Минуло 10 років од смерти проф. Іштвана Удварія

Недавно минуло 10 років од дня смерти Іштвана Удварiя (*14. юлiя 1950 р. Торнёшпальца – † 9. новембра 2005, Нїредьгаза), вызначного русиністы, професора, основателя і довгорічного ведучого катедры україньской і русиньской філолоґії Нїредьгазькой высшой школы (Nyíregyházi Főiskola).

Проф. І. Удварій в 1975 р. скінчів історію і російску філолоґію на Універзітї Лайоша Кошута в Дебрецінї, а пак 3 рокы учітелёвав у місті Кішварда. В 1978 р. став ся учітелём Ніредьгазькой высшой школы (до 2000 р. знамой як Педаґоґічна школа Дёрдя Бешшенія). Свою маґістерьску роботу присвятив мадярізмам у бачваньскім варіянтї русиньского языка, а докторьску – писменности Русинів в XVIII. сторочу. Величезну часть своёй науковой карьєры веновав баданю в области русиністікы. Быв промотором маґістерьскых і докторьскых русиністічных і іншых дізертацій. Сам орґанізовав і брав участь на многых научных конференціях. На Высшій школї в Нїредьгазї учів російскый язык і літературу. В 2002 р. провів акредітацію катедры україньской і русиньской філолоґії, дїючой на самый перед як інштітут будучого важного світового центра мадярьско-русиністічных бадань. Будучі бадателём в многых научных областях, проф. Іштван Удварій был автором учебників, науковных робот, книжок, статей, котры ся дотыкали різных сфер языкознательства, літературы, етноґрафії, історії, реліґії, а їх чісло раховане на тісячі (доступне в електронічній верзії).

Проф. Іштван Удварій – то участник многых міджінародных конференцій, член многых научных асоціяцій і лавреат многых премій, нагород і оцїнїнь. Вмер 9. новембра 2005 р. в Ніредьгазї, маючи лем 55 років.

В 2010 роцї, з нагоды 5. річніцї смерти і 60. річніцї народжіня Іштвана Удварія была орґанізована научна конференція. Подобна конференція проходила 13. новембра 2015 у Будапештї.

Демко Трохановскый