Під таков назвов буде міджінародна конференція 4. децембра 2014 у Празї, котру приправили: Дім народностных меншын у Празї, Уряд влады Чеськой републікы, субєкт Прага і Етнолоґічный інштітут Академії наук ЧР в рамках 14. Стрічі народностных маншын і під покровительством міністра Мґр. Їржіго Дінстбіра і заступцю пріматора главного міста Прагы Інж. Вацлава Новотного. На конференція буде мати три блокы, а то Притомность народностных меншын у Празї і їх актівіты, Меншыны і материньскый язык і Народностны меншыны і міґранты. Треба припомянути, же в другім блоку выступить і доц. ПгДр. Анна Плїшкова, ПгД., з Інштітуту русиньского языка і културы Пряшівской універзіты в Пряшові, а то з рефератом Русиньскый язык на Словеньску 20 років по кодіфікації. Треба підкреслити, же споминаный інштітут уж мать міджінародне реноме, кідь на різны загранічны конференції, сімпозії і семінарі позывать і єй робітників.

-аз-