Обчаньске здружіня молоды.Русины мало свій сейм

В недїлю 6-го децембра 2015 р. проходив сейм молодежной орґанізації молоды.Русины. Із функції председы одышов Петро Штефаняк, котрого вычеряв Петро Ярінчік. Сейм быв зорґанізованый в селї Малый Липник, Старолюбовняньского окресу.

На 8 сеймі молодых.Русинів (орґанізація має сейм раз за рік)одходжаючому із функції Петрови Штефанякови передали Честнеоцїнїня за довгодобый вклад до розвитку молодежи русиньского народа. На функцію председы быв выбратый Петро Ярінчік, котрый походить зо Шамброна і в професійнім жывотї робить проґраматора. Сейм выбрав і нову Дозорну раду і Выконный выбор. Скоро цїле веджіня орґанізації было вычеряне новыма людми. Штефаняк не кандідовав на жадну функцію, зістав рядным членом орґанізації.

Орґанізація молоды.Русины офіціално выникла у 2008 роцї в Братїславі. Свої містны орґанізації окрем Братїславы має і в Нітрї, Кошіцях і в Старій Любовни. Головным основателём, котрый од 2008 року стояв на челї орґанізації, быв Петро Штефаняк. Мено Штефаняка і орґанізації молоды.Русины є таксамо звязане із заснованём фолклорного ансамблю Рутенія, ці заснованём радіа русин.фм, но і далшых проєктів, котры членымолодых.Русинів роблять про розвиток русиньской културы на Словакії і здобытя до своїх рядів молодых людей, котры мають русиньске корїня. Молодежна орґанізація є таксамо членом і основателём Світового форуму русиньской молодежи, на челї котрого дакілько років стояв якраз представитель орґанізації молоды.Русины – Мартін Караш. В Братїславі орґанізація вытоврила Центер молодых Русинів. Тот служить як центер културного жывота Русинів, котры жыють або штудують в главнім містї Словакії.

П. M.