Учітелька русиньского языка в Пчолинім Власта Мороховічова славить своє 60-річа

Власта Мороховічова ся народила 21. децембра 1955 в Снинї своїм родічам Марії і Янови Чорняковым із Пчолиного як перша із двох дївок. 21. децембра 2015 славить 60 років свого жывота. Ку їй красному юбілею ї хочу пожелати вшытко найлїпше, ай надале велё здоровя і людьского тепла. Доброту і ласку к людём ї видно в очах, чути в їй мнягкім голосї, котрый так люблять єй школярї і колеґове.

В 1978 роцї ся оддала за Павла Мороховіча і з їх манжелства взышли двоми сынове – Павел і Роберт.Жычу їй много потїхы із своїх властных дїтей і внучат, но таксамо із єй дїточок – школярїв, котрых выховала почас своёй професіоналной карьєры на двох школах – в Гостовіцях і в Пчолинім цїлы ґенерації.

На основну школу ходила Власта Чорнякова 9 років у своїм роднім селї Пчолине, ґімназію закінчіла в Снинї, в україньскій секції. По ґімназії поступила на Педаґоґічну факулту Універзіты Павла Йозефа Шафаріка у Пряшові, де закінчіла шпеціалізацію –  учітельство першого ступня в україньскім оддїлїню.

В 1979 роцї зачала учіти як учітелька першого ступня на Основній школї в Гостовіцях, де од 1980 року была і директорков школы. На Основну школу в Гостовіцях ходили і дїти з дїтьского домова в Гостовіцях. В особі учітелькы Власты Мороховічовій находили любов і мудрость, котру їм не дали їх властны родічі.

Од 2003 року зачала учіти на ОШ з МШ в Пчолинім, де учіть дотеперь. Выховала много будучіх докторів, учітелїв, інжінїрів, што значіть, же і вдяка учітельцї Властї Мороховічовій із прімарного ступня пчолиньской основной школы много Русинів досягло высокошкольску освіту. А то ай молоды жены – Русинкы, котрым ся отворили дверї до такых професій, што были в тых обшарках традічно мужскыма: інжінїркы економії, потравинарьской хемії, польногосподарства, докторкы, правнічкы... Ласку ідпознаню діставали од самого початку – такой в своїй першій школї. Дїти ю барз люблять і вертають ся ід нїй, жебы єй принесли свій матурітный поздрав, жебы ся єй похвалили своїма успіхами в далшых школах і на своїм робочім місцю, але і поскаржити ся на свої неуспіхы... Школярї гостовіцькой і пчолиньской основной школы нїґда не забудуть на свою учітельку Власту Мороховічову, бо спознали при нїй єден важныйєй знак єй характеру – справодливость. Їх учітелька Власта была прісна, но справодлива. Прісна зато, жебы їх научіла максімум. Справодлива зато, бо знала, же добрый учітель мусить быти ай справодливый. Вшыткы дїти перед ним суть рівны, вшыткы ся учать і суть одмінёваны на основі єднакых правил. Учітель або учітелька, котра в своїм навчаню принціп справодливости не дотриміє, не є добрым учітелём або учітельков. Но Власта Мороховічова має в собі – десь глубоко в своїм сердцю – закодованый принціп справодливости, доброты і ласкы ку дїтём. Зато є нелем добрым чоловіком, але тыж прикладным педаґоґом, облюбленым міджі своїми школярями.

10 років на Освновній школї з Матерьсков школов у Пчолинім учіла Власта Мороховічова русиньскый язык у формі кружка або неповинного предмету і 10 років приправлює своїх школярїв на цїлословеньскый конкурз у декламації в русиньскім языку – Духновічів Пряшів. Ани єден рік їй выхованцї не одышли із Пряшова без оцїнїня. Наприклад, така Аннамарія Ґніпова, веценасобна лавреатка Духновічового Пряшова. По матурї сі выбрала штудіум русиньского языка на Пряшівскій універзітї вдяка своїй учітельцї на першім ступню Основной школы в Пчолинім – Властї Мороховічовій. В 2015 роцї порота Духновічового Пряшова оцїнила найвеце школярїв під веджіннём єдной учітелькы, праві Мґр. Власты Мороховічовой із Пчолиного.

Власта Мороховічова на своїй школї приправлює веце раз в роцї із школярями културный проґрам про цїле село Пчолине. Про жены ку святу МДЖ, про старшых людей – ку Дню почливости ід старшым, про вшыткых ку рождественным святам. Проґрам, котрый приправлює Власта Мороховічова із своїма школярями є основаный на декламації творчости русиньскых писателїв і поетів, но і на творчости самых школярїв ці творчости самой Власты Мороховічовой, котра з дїтми любить приправлёвати сценкы із сучасного жывота. А тоты ся потім люблять вшыткым позерателям.

Од септембра 2013 року веде Власта Мороховічова на ОШ з МШ в Пчолинім вечерню школу русиньского языка обчаньского здружіня Колысочка – Kolíska і з єдной класы, в котрій учіла дїточкы од другого по девятый рочник, ся вытворили на школї в Пчолинім дві класы: молодшых і старшых школярїв. Была єм притомна на веце годинах русиньского языка Власты Мороховічовой в рамках нашой вечернёй школы русинського языка про дїти і дорослых в Пчолинім і я сама як бывша учітелька дорослых штудентів на высокій школї єм обдивляла сістем навчаня, котрый має в собі. Учіти дїточкы із цїлой школы – од другой по девяту класу – і мотівовати їх ку учіню, то было велике учітельске уменя. Власта го в собі має. Наконець, свідчіть о тім ай факт, же до нашой вечернёй школы русинського языка в Пчолинім зачало ходити тілько дїтей, же сьме могли отворити дві класы. Зажыла єм Властины годины як надгерный педаґоґічный концерт нарочности і ласкавости ід своїм школярям. Школярї ся на каждій Властиній годинї велё научать, мусять быти на годины приправлены, бо є приправлена і їх учітелька. Нарочность і професіоналность їх учітелькы уж на основній школї є про них великов девізов до жывота. Через высокы нарокы своёй учітелькы Власты Мороховічовой нашли наконець себе самых – як способных вырїшыти в жывотї тяжкы і великы задачі і посувати ся нима допереду. Властина ласкавость, мудрость і справодливость ку дїтём із них робить таксамо добрых, ласкавых і мудрых людей.

Колеґове із їй школы мі повіли, же „є прісна на себе і на школярїв, і тот професіоналный приступ к учіню, котрым ся рядить цїлый свїй актівный професіоналный жывот, ся одражать на школярях, котры абсолвовали нашу основну школу.“

О Властї Моровічовій із Пчолиного, котра славить свою шістьдесятку, так мож сміло написати, же учіня не є про ню лем роботов, но главнї посланём. Мґр. Власта Мороховічова із Пчолиного выховала цїлы ґенерації дїтей ід скромности, мудрости і гордости на себе самых. Уж на основній школї вдяка нїй порозуміли, хто суть. Люде, рівны другым людём на Словеньску, Русины, бо їх родічі і дїдо з бабов суть або были Русины. Бодай бы вшыткы учітелькы і вшыткы учїтелї в нашых русиньскых селах повнили своє посланя в жывотї так, як го з честёв, достойностёв і ласков повнить учітелька Власта Мороховічова.

На многая і благая лїта нашій русиньскій учітельцї Властї Мороховічовій із Пчолиного.

Люба КРАЛЁВА