На сімпозіумі в Братїславі были презентованы і Русины

10. децембра 2014 ся одбыло в Братїславі сімпозіум з нагоды 50. выроча взнику катедры славістікы на Універзітї Коменьского в Братїславі. 

Як підкреслила ведуча катедры – доц. ПгДр. Марія Добрікова, к. н., не было легко утримати катедру в  условіях, кідь славяньскы языкы суть, так бы повісти, на періферії інтересу штудентів на Словакії. Конець-кінцїв, не вытримав тот тиск ани Інштітут славістікы у Пряшові, котрый заложыла важена славістка, професорка Юлія Дудашова-Крішшакова. В сучасности єй богаты скушености і вынятковы знаня з области славістікы вывжывать Інштітут русиньского языка і културы Пряшівской універзіты (ІРЯК ПУ) в Пряшові. В рамках ІРЯК выступила на сімпозію  проф. ПгДр. Юлія Дудашова-Крішшакова, др. н., з темов: Од політонії к монотонії (о змінах прозодічной сістемы в списовній словінчінї з аспекту фонолоґічной тіполоґії). Із здравотных прічін не могла на сімпозіум прийти доц. ПгДр. Анна Плїшкова, ПгД. , зато єй тему Русиньскый язык в едукачній сістемі СР і в загранічу запрезентовала ПгДр. Кветослава Копорова, ПгД. а тему Выдавательскы актівіты Русинів по роцї 1989авторкы К. Копоровой прочітав молодый докторанд (тогорічный абсолвент штудійного проґраму русиньскый язык і література в комбінації зо словацькым языком і літературов) Мґр. Михал Павліч, котрый ся в рамках докторандьскых штудій занимать русиньскій літературї.

Вшыткы три роботы будуть публікованы в зборнику Філозофічной факулты Універзіты Коменьского в Братїславі під назвов Славяньскы языковы і літературны (само)рефлексії, в рамках серії Philologica зачатком рока 2015.

-кк-

 

Teксты під фоткы:

• ПгДр. К. Копорова. ПгД., на сімпозіумі в Братїславі выступила з рефератом доц. ПгДр. А. Плїшковой, ПгД..

• Мґр. Михал Павліч із ІРЯК ПУ выступив з рефератом ПгДр. К. Копоровой, ПгД.

• К. Копорова і М. Павліч у дружнїй і дїловій дебатї з М. Добріковов і Ю. Ґловнём, якый вів секцію, в котрій выступили і нашы славісты-русиністы. 

Go back