Іван Міклош, Русин зо Словакії – шефом порадцїв у Києві

Бывшый словацькый міністер фінанцій Іван Міклош ся став шефом порадцїв україньской міністеркы фінанцій Наталії Яреско. Інформують о тім україньска аґентура Unian і сервер Ukraine Today.

Подля інформацій україньскых медій ся буде Міклош занимати головно вопросами в области даней, децентралізації і цїлковой реорґанізації верейных фінанцій. Міклош є далшым чуджінцём, од котрого собі Україна обіцять злїпшіня своёй економічной сітуації. Сама Наталія Яреско ся народила в США а україньскым міністром господарьства є чоловік із Літвы – Айварас Абромавічіюс. В децембрї ся намістниками на міністерстві справедливости стали одборници з Літвы і Ґрузії.

Іван Міклош ся народив 2. юна 1960 р. у Свіднику. Быв во веце функціях в різных чехословацькых і словацькых владах по 1989 роцї. Перед переписом людей у 2011 роцї на Словакії, коли русиньскы орґанізації робили кампань, жебы люди голосили ся ку свому русиньскому походжіню, Міклош публічно написав о тім, же є Русином, і же ся ку тій народности буде в переписї голосити.

Петро МЕДВІДЬ, 19. 2. 2015