Одбыв ся 29. научный семінар карпаторусиністікы

18. фебруара ся в засїдалнї Consilium maius Ректорату Пряшівской універзіты одбыв уже 29. научный семінар карпаторусиністікы, якый реґуларно орґанізує Інштітут русиньского языка і културы ПУ.

 

ПгДр. Кветослава Копорова, ПгД. отворила першый семінар в тім роцї, привітала участників і представила выступаючу Мґр. Івану Сливкову, ПгД., літератку з Інштітуту україністікы і середнёевропскых штудій Філозофічной факулты ПУ, яка ся уже довшый час занимать і русиньсков літературов, респ. творчостёв русиньскых писателёк.

 

На семінарі выступила з лекціов під назвов Творчость Кветы МороховічовойЦвик – нова лінія русиньской женьской поезії на Словакії.Ку творчости авторкы приступовала з діахронного назераня, причім выпробовала підкреслити знакы, якыма была, і якыма є творчость Кветы Мороховічовой Цвик призначна. Лекція была інтересна нелем про слухачів, але і про саму авторку, бо погляды літератів-одборників можуть автора оцїнити, но таксамо го напрямити ці аж выпровоковати к якостнїшій творчости.

 

В рамках семінара были представлены і найновшы выданы публікації з карпаторусиністікы.  Дакотры з них сі могли участници дати авторам підписати. Міджі іншыма то была найновша збірка поезії Кветы Мороховічовой ЦвикЛюбовны періпетії, Русиньскый новінарь автора Владиміра Ілковіча і книжка про дїти молодого автора Петра ЯлчаМамко, подьме чітати… . Представлена была і публікація Русиньскый язык про найменшых, выдана обчаньскым здружінём Колысочка і найновіша збірка поезії Юрка ХаритунаМої надїї, яку выдала Академія русиньской културы в СР.

 

Мґр. Зденка ЦІТРЯКОВА, фоткы авторкы

тексты к фоткам:

1. Погляд на часть участників 29. научного семінара карпаторусиністікы на Пряшівскій універзітї 18. фебруара 2015.

 

2. Реферуюча на 29. семінарї – Мґр. І. Сливкова, ПгД., літератка з Інштітуту україністікы і середнёевропскых штудій Філозофічной факулты ПУ,

 

3. На конець семінара была автоґраміада авторів найновшых книжок, якы в роцї 2014 вышли  в русиньскім языку. На фотцї К. Мороховічовой Цвик підписує свій зборник поезії  Любовны періпетії.

Go back